Այսօր «Մասնագիտական կողմնորոշումը որպես ցկյանս ուսումնառության գործընթաց» համաժողովի շրջանակներում տեղի ունեցավ «Կարիերան ավելին է, քան զուտ աշխատանքը» ձեռնարկի շնորհանդեսը: Ինչպես իր բացման խոսքում տեղեկացրեց ձեռնարկի հեղինակ, Երիտասարդների մասնագիտական կողմոնորոշման կենտրոնի ՊՈԱԿ-ի տնօրեն Հայկուհի Գևորգյանը, ձեռնարկը մշակվել է Բրիտանական խորհրդի «Հմտություններն աշխատանքում» ծրագրի շրջանակներում` ՀՀ աշխատանքի և սոցիալական հարցերի նախարարության հետ համատեղ:
«Ձեռնարկի նպատակն է ներկայացնել մասնագիտական կողմնորոշման, համակարգի մասնագետների գործունեության հնարավորությունները` երիտասարդներին ապագա մասնագիտության ընտրության ուղղորդման հարցում: Գրքում ներկայացված է համակարգի տեսությունն ու Հայաստանում գործարկման հնարավորությունները, Միացյալ Թագավորության փորձը այս ոլորտում և ծառայությունների նկարագիրը»,- ասաց Հ. Գևորգյանը` հավելելով, որ ձեռնարկը բաղկացած է 6 մասից և շատ «գործնականորեն ներկայացնում է կարիերան»:
Բացման խոսքով հանդես եկավ նաև Բրիտանական խորհրդի հայաստանյան գրասենյակի տնօրեն Արևիկ Սարիբեկյանը, ով նշեց, որ մասնագիտական կողմնորոշումը Միացյալ Թագավորության կրթական ոլորտի բաղկացուցիչն է: Նա նաև ասաց, որ Հայաստանում մասնագիտություն ընտրելիս` մարդիկ շարժվում են իրենց ծնողների ցանկություններով կամ շուկայի պահանջարկով, սակայն պետք է յուրաքանչյուրն ընտրի այն մասնագիտությունը, որում նա կունենա իր փայլուն կարիերան: Ըստ Բրիտանական խորհրդի տվյալների` Հայաստանում շուրջ 114 հազար ուսանող սովորում է բարձրագույն ուսումնական հաստատություններում, գրեթե 31 հազարը միջին մասնագիտական կրթական ծրագիր է իրականացնում` ուսումնական հաստատություններում:
Հետազոտությունները փաստում են, որ աշակերտների շրջանում մասնագիտական կողմնորոշման աշխատանքներ չեն իրականացվում, ուստի համաժողովը և ձեռնարկը նպատակ ունեն նպաստել մասնագիտական ճիշտ կողմնորոշմանը:
