Ռուսական Regnum լրատվական գործակալության փոխանցմամբ՝ Ադրբեջանի նախագահ Իլհամ Ալիևը «Ալ-Ջազիրա» հեռուստաալիքին տված հարցազրույցի ժամանակ անդրադարձել է Ղարաբաղյան հակամարտության կարգավորմանը.
«Ղարաբաղյան հակամարտությունը տարածաշրջանի համար ամենամեծ սպառնալիքն է։ Շփման գծում իրավիճակը շատ փխրուն է։ Փաստացիորեն գոյություն չունի խաղաղություն։ Չնայած որ 1994 թվականին կնքվել է զինադադար, ցայժմ խաղաղություն ձեռք չի բերվել։ Դրա համար էլ ոչ ոք չի կարող բացառել շփման գծում զարգացման որևէ սցենար։ Այդ տեսանկյունից բոլորի, այդ թվում՝ նաև Ադրբեջանի համար շատ ավելի լավ կլինի, եթե հակամարտությունը շուտափույթ լուծում ստանա։
Պատերազմի ժամանակ մենք ունեցել ենք 12-15 հազար սպանված և անհետ կորած։ Հայկական կողմի կրած կորուստների մասին ավելի լավ կիմանան իրենք՝ հայերը։ Կարծում եմ, որ սա ամենավտանգավոր հակամարտությունն է, քանի որ անհնար է կանխատեսել, թե ինչ տեղի կունենա։ 1990-ական թվականների սկզբին ադրբեջանցիները վտարվեցին ոչ միայն Լեռնային Ղարաբաղից, այլև նրան հարակից 7 շրջաններից։ Ընդհանուր առմամբ, մենք ունենք «1 միլիոն» փախստական ու հարկադիր վերաբնակ։
Ցայժմ մենք հավատում ենք, որ հակամարտությունը կարգավորվելու է խաղաղ ճանապարհով, քանի որ «պատմական և իրավական տեսանկյունից» Լեռնային Ղարաբաղը մերն է։ Հակամարտության կարգավորումը պետք է տեղի ունենա միջազգային իրավունքի նորմերի ու սկզբունքների հիման վրա։ Ադրբեջանի տարածքային ամբողջականությունը «պետք է վերականգնվի», հայկական զորքերը «պետք է դուրս գան» բոլոր «օկուպացված» տարածքներից, ադրբեջանցիները «պետք է իրավունք ստանան» վերադառնալու իրենց տները, այդ թվում՝ նաև Լեռնային Ղարաբաղ։
Լեռնային Ղարաբաղին կարող է տրվել ինքնավարության կարգավիճակ։ Աշխարհում և Եվրոպայում գոյություն ունեն ինքնավարության լավ օրինակներ։ Կան այնպիսի երկրներ, որոնք իրենց տարածքային ամբողջականությունը վերականգնել են իրենց հիմնական տարածքից հազարավոր կիլոմետրեր հեռավորության վրա։ Մինչդեռ Լեռնային Ղարաբաղը «գտնվում է» Ադրբեջանի կենտրոնում։
Մենք ցանկանում ենք վերականգնել մեր տարածքային ամբողջականությունը, և ցանկանում ենք դա անել խաղաղ ճանապարհով։ Սակայն կարելի է ասել, որ արդեն 20 տարի է, ինչ միջազգային միջնորդներն անարդյունք աշխատում են տվյալ խնդրի շուրջ»։
