Հայաստանի ամերիկյան համալսարանում այսօր` հոկտեմբերի 15-ին, տեղի ունեցավ Միջազգային կրթության ամերիկյան խորհուրդների կրթական խորհրդատվական կենտրոնի կազմակերպած կրթական տեղեկատվական ցուցահանդեսը:
Ինչպես «Առաջին լրատվականի» հետ զրույցում ասաց Միջազգային կրթության ամերիկյան խորհուրդների կրթական խորհրդատվական կենտրոնի ներկայացուցիչ Հասմիկ Ավետիսյանը, ցուցահանդեսի նպատակն է լայն հասարակությանն իրազեկ դարձնել կազմակերպության գործունեությանն ու ծրագրերին, ինչպես նաև ԱՄՆ-ում ուսման և գիտահետազոտական աշխատանք վարելու հնարավորություններին:
Հատկանշական է, որ ԱՄՆ համալսարանները սեփական կրթական ծրագրերը ներկայացնում էին հանպատրաստից` իրենց առանձին տրամադրված փոքրիկ տաղավարներում: Դրանցից գրեթե բոլորի մոտ հետաքրքրված երիտասարդների մեծ բազմություն էր հավաքված:
Ինչպես, օրինակ, մեզ հետ զրույցում տեղեկացրեց ԱՄՆ-ում մասնաճյուղեր ունեցող Լոնդոնի Հալթի բիզնես-դպրոցի ներկայացուցիչը, իրենք այս պահի դրությամբ բազմաթիվ հայտեր ունեն, և հետաքրքրված հայ երիտասարդներին առաջարկում են իրենց մոտ ուսանելու և քննությունները լավ հանձնելու դեպքում մինչև 25 տոկոս զեղչեր տրամադրել: «Մեր դպրոցն իր տեսակի մեջ հինգերորդն է աշխարհում, նրա մասին բազմիցս խոսել է նաև Apple-ի հիմնադիր Սթիվ Ջոբսը»,- նշեց կրթօջախի ներկայացուցիչը
Գրանցվածների քանակից չդժգոհեցին նաև Բուլղարիայում ամերիկյան համալսարանի և Սավաննայի արվեստի և դիզայնի կենտրոնի տաղավարների ներկայացուցիչները` որպես իրենց առաջարկած կրթական ծրագրի առավելություն նշելով մինչև 50 տոկոս` տասներեք հազար դոլարի չափով, զեղչերը, իսկ ընդունելության քննությունները միջինից բարձր գնահատականներով հանձնելու դեպքում` բոլորովին անվճար ուսումը:
Նշենք, որ միջոցառմանը ներկա էին ԱՄՆ հետ փոխանակման ծրագրեր վարող միջազգային կազմակերպությունների ներկայացուցիչներ, ինչպես նաև օտար լեզվի դասընթացներ առաջարկող կազմակերպություններ Երևանից, որոնք լեզվի ուսուցման անվճար կուրսերի վիճակահանություն էին անցկացնում:
Ցուցահանդեսին առանձին տաղավարներով ներկայացված էին Օհայոյի պետական համալսարանը, Դյուկի համալսարանը, Վաշինգտոնի ամերիկյան համալսարանը, Հալթի բիզնես-դպրոցը, Սավաննայի արվեստի և դիզայնի կենտրոնը, ինչպես նաև Բուլղարիայում Ամերիկյան համալսարանը:
