«Թուրքիան չի հայտարարում, որ պատերազմ է սկսում Իրաքի դեմ, այն պարզապես ասում է, որ մաքրեն իրենց երկիրը ահաբեկչական խմբավորում համարվող Քրդական բանվորական կուսակցությունից, եթե ոչ, ապա դա կանենք մենք»,- այսօր լրագրողների հետ հանդիպման ժամանակ կարծիք հայտնեց թուրքագետ Անդրանիկ Իսպիրյանը:
Իրանագետ, պատմական գիտությունների թեկնածու Ռուդոլֆ Յարալյանն էլ հավելեց, որ տպավորություն է ստեղծվում, որ Թուրքիայում հույս ունեն, թե Իրաքից ամերիկյան զորքերի դուրսբերումից իրենք կարող են լցնել ստեղծված վակուումը. «Դա գալիս է Թուրքիայի պանթուրքիստական ծրագրից, նրանք ուզում են որոշիչ ազդեցություն ունենալ տարածաշրջանում, սակայն կարծում եմ՝ Արևմուտքին ձեռնտու չէ Թուրքիայի նման ռազմական ակտիվությունը, և նրանք ունեն լծակներ Թուրքիայի վրա ազդելու համար»:
Նա նկատեց, որ Թուրքիան այսօր նկրտումներ ունի նաև Սիրիայի նկատմամբ, սակայն բանախոսը թերահավատորեն է մոտենում այն դիտարկմանը, որ Թուրքիան կհամարձակվի մտնել նման գործընթացի մեջ միաժամանակ, քանզի Սիրիայում ևս կան Քրդական բանվորական կուսակցության ներկայացուցիչներ: Իսպիրյանն էլ հավելեց, որ Սիրիայի իշխանությունները միշտ էլ լավ են վերաբերվել Քրդական բանվորական կուսակցության ղեկավարներին և Թուրքիայի կողմից Սիրիա մտնելուն պես վերջիններս կակտիվանան:
Յարալյանն, իր հերթին, շեշտեց Իրանի դերակատարությունն այս գործընթացներում՝ նկատելով, որ վերջինս էլ է համարվում կարևոր գործոն տարածաշրջանում և Թուրքիայի ակտիվությունը նրան էլ դուր չի գա:
Թուրք-իսրայելական հարաբերությունների մասին խոսելով՝ Յարալյանը նկատեց, որ այդ հարաբերությունները կլարվեն նաև հետագայում, սակայն ռազմական գործողությունների չի հասնի, որովհետև դա թույլ չեն տա արևմտյան պետությունները:
