ԼՂՀ Արտաքին քաղաքականության և անվտանգության հանրային խորհրդի նախագահ Մասիս Մայիլյանն «Առաջին լրատվականի» հետ զրույցում խոսելով Աղդամի շրջանում ադրբեջանցիների կողմից կառուցվող պատի մասին՝ նկատեց, որ թեև ադրբեջանական լրատվամիջոցները մեկնաբանում են, թե պատը կառուցում են, որ պաշտպանեն խաղաղ բնակչությանը, սակայն նրա դիտարկմամբ, եթե ադրբեջանական կողմը իրոք ուզում է պաշտպանել իր երկրի քաղաքացիների անվտանգությունը, ապա ամենաճիշտ ու ամենաէժան ճանապարհն այն է, որ հետևեն 1994թ. մայիսին ստորագրված զինադադարի մասին համաձայնագրին:
Ըստ Մայիլյանի՝ 700-մետրանոց պատի կառուցումը ոչ թե պատերազմի սպառնալիքի վկայություն է, այլ պարզապես այն վկայում է, որ Ադրբեջանը պատրաստ չէ հետևելու ստանձնած պայմանավորվածություններին. «Նրանք այս կերպ ցույց են տալիս, որ չեն հրաժարվում դիպուկահարների պատերազմից և փորձում են այդ կերպ կիսով չափ անվտանգություն ապահովել իրենց բնակչության համար»:
Մայիլյանի կարծիքով՝ պատ կառուցելը պաշտպանության անարդյունավետ և սխալ պատերազմ է և միակ ճիշտ ճանապարհը դիպուկահարներից հրաժարվելն է. «Փորձը ցույց է տալիս, որ մեր պաշտպանական բանակը միշտ պատասխան գործողություններ է ձեռնարկում և բավական է, որ Ադրբեջանը չխախտի զինադադարի ռեժիմը, ապա դրանով կապահովի իր թե՛ քաղաքացիների, թե՛ զինծառայողների անվտանգությունը»:
