Հոգեբան Անահիտ Ղազարյանը մեզ հետ զրույցում անդրադառնալով բանակում կատարվող սպանությունների և ինքնասպանությունների առանձնահատկություններին և ելքերին նշեց, որ ստեղծված իրավիճակից դուրս գալու ելքեր տեսնում է և ավելացրեց. «Այսօրվա տղաների մեծ մասը հոգեբանորեն պատրաստ չի գնում ծառայության: Բացի այդ, բանակի մասին շատ վատ արձագանքներ կան՝ միգուցե սուբյեկտիվ, միգուցե չարդարացված, և արդեն վաղվա դեռահասը շատ դժվարությամբ է գնում ծառայության, որովհետև մտավախություն ունի: Ինքը հուսալի չի համարում:
Մյուս խնդիրն այն է, որ ծնողների մի մասը տղաներին հուսադրում է, որ կազատեն ծառայությունից, բայց հետո չի ստացվում: Երեխան հոգեբանորեն չի պատրաստվում ծառայությանը, մտածում է, որ չի գնալու, և երբ այնպես է ստացվում, որ գնում է, պարզվում է, որ պատրաստ չի ծառայության: Իսկ երրորդն այն է, որի մասին այսօր անգամ զրուցում եմ ուսանողներիս հետ՝ 18-ը նոր բոլորած տղաներն այնքան հասուն ու կայացած չեն, որպեսզի ինտելեկտուալ մակարդակով հարցերը լուծեն»: