Ադրբեջանական APA լրատվական գործակալության փոխանցմամբ՝ Թուրքիան մտադիր է Ադրբեջանին վաճառել T-155 «Ֆըրթընա» (թարգմանաբար՝ փոթորիկ) ինքնագնաց հրետանային համակարգ, չնայած մի շարք եվրոպական ընկերություններ խոչընդոտում են դրան։ Այս մասին հայտարարել է Թուրքիայի պաշտպանական արդյունաբերության նախարարության քարտուղար Մուրադ Բայարը։
Նշվում է, որ եթե անգամ Թուրքիայի ու Ադրբեջանի միջև համաձայնություն կայացվի «Ֆըրթընա»-ի գնման շուրջ, ապա նախագծում ի հայտ են եկել մի շարք տեխնիկական խնդիրներ։ «Ֆըրթընա»-ին շարժիչ մատակարարող գերմանական MTU ընկերությունը ղարաբաղյան հակամարտության պատճառով հրաժարվել է Ադրբեջանին վաճառել շարժիչներ՝ այդ հրետանային համակարգի համար։ Նույնպիսի խնդրի է բախվել նաև թուրքական «Յոնջա օնուք» ընկերությունը, որը ցանկանում է Ադրբեջանին վաճառել մոտորանավակներ։
Բայարը նշել է, որ ստեղծված պայմաններում Ադրբեջանը պետք է փորձի շարժիչներ գնել մեկ ուրիշից կամ էլ սպասի 4-5 տարի, մինչև Թուրքիան կատարելագործվի շարժիչների արտադրության ոլորտում։ Բայարի խոսքերով՝ T-155 «Ֆըրթընա» ինքնագնաց հրետանային համակարգը շատ հզոր զենք է, ինչը լրացուցիչ ուժ կհաղորդի Ադրբեջանին։
«Ֆըրթընա»-ի երկարությունը կազմում է 12 մետր, լայնությունը՝ 3.5 մետր, քաշը՝ 47 տոննա, արագությունը՝ 66 կմ/ժամ, անձնակազմը՝ 5 մարդ։ Այն հագեցած է MTU-881 KA 500 դիզելային շարժիչով, սպառազինության մեջ մտնում են 155 միլիմետր տրամաչափի L-52 հրանոթը և 12.7 միլիմետր տրամաչափի գնդացիրը։ Այս հրետանային համակարգը հաջողությամբ գործում է 40 կիլոմետր հեռավորության վրա գտնվող թիրախների դեմ։
