Տարեցների հանդեպ հոգատար վերաբերմունքն ու սոցիալական աջակցությունը եղել և մնում է պետության ու տեղական ինքնակառավարման մարմինների ուշադրության կենտրոնում: Այդ են վկայում նաև տարեցների համար Երևանի քաղաքապետարանի կողմից իրականացվող սոցիալական տարաբնույթ ծրագրերը:
Մասնավորապես, մայրաքաղաքում այսօր բնակվում է 100 և ավել տարեկան 24 քաղաքացի, ովքեր Երևանի քաղաքապետարանի և Հայաստանի Հանրապետական կուսակցության համատեղ սոցիալական աջակցության հերթական ակցիայի շրջանակում դրամական օգնություն և նվերներ են ստացել:
«Սոցիալական ռիսկի խմբեր ներկայացնող մեր քաղաքացիների նկատմամբ Երևանի քաղաքաետարանը առօրեական հոգածություն ունի և հաճախ, նման այցելություններով, նպատակ ունենք անձամբ տեղեկանալ այդ քաղաքացիներից յուրաքանչյուրի կեցության մասին»,- նշել է Երևանի քաղաքապետրանի սոցիալական ապահովության վարչության պետ Ռուզաննա Զաքարյանը:
Կարևորելով տարեցների համար իրականացվող սոցիալական տարաբնույթ ծրագրերն ու նախաձեռնությունները՝ Երևան քաղաքի ավագանու ՀՀԿ խմբակցության անդամ Նաիրա Նահապետյանը շեշտել է, որ քաղաքապետարանը Երևանի տարեց քաղաքացիների, վետերանների և սոցիալապես անապահով ընտանիքների համար նաև գույքահարկի մասով զիջումներ է ծրագրել և իրականացնում:
ԱԺ պատգամավոր, Հանրապետական կուսակցության կանանց խորհրդի նախագահ Հերմինե Նաղդալյանն էլ հավելել է, որ սոցիալական ռիսկի խմբերին նման ուշադրությունը պետական սոցիալական հիմնական ուղղվածությանը աջակցող ծրագրեր են, որոնք ևս ամենօրյա աշխատանք ու հետևողականություն են պահանջում:
«Ըստ էության, սա Հանրապետական կուսակցության ծրագրային առաջնահերթություն է ու, ըստ այդմ, պարբերաբար իրականացվող ակցիաների շրջանակում կուսակցությունն իրացնում է իր իսկ ծրագրային պարտավորությունը» – նշել է Հերմինե Նաղդալյանը: Պատգամավորը նաև հավելել է, որ նմանատիպ ակցիաները լինելու են շարունակական:
