Այսօր Հայ-ռուսական (Սլավոնական) համալսարանում տեղի ունեցավ Տելեբժշկությանն ու էլեկտրոնային առողջապահությանը նվիրված առաջին հայկական միջազգային «Արմենտելեմեդ. ճանապարհ դեպի ապագա» կոնգրեսի հանդիսավոր բացման արարողությունը: Կոնգրեսը կազմակերպել է Տելեբժշկության հայկական ասոցիացիան` Հայ-ռուսական համալսարանի և ինֆորմացիոն տեխնոլոգիաների ձեռնարկությունների միության հետ համատեղ, որի նպատակն է ուսումնասիրել և քննարկել տելեառողջապահության և հարակից առողջապահական ոլորտի խնդիրներն ու ձեռքբերումները:
Բացման խոսքով հանդես եկան ՀՀ առողջապահության փոխնախարար Սերգեյ Խաչատրյանը, ՀՀ Ազգային ժողովի Առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը, Տելեբժշկության հայկական ասոցիացիայի նախագահ Գեորգի Չալպիկյանը և Հայ-ռուսական համալսարանի ռեկտոր Արմեն Դարբինյանը: ՀՀ առողջապահության փոխնախարարն իր խոսքով ողջունեց կոնգրեսի բոլոր զեկուցողներին և մասնակիցներին, նշելով, որ սա է ճանապարհը դեպի ապագան և ճանապարհը դեպի առողջապահական ոլորտի զարգացումը:
Ըստ նրա, եթե նայելու լինենք վերջին տարիներին, ապա առողջապահական համակարգը վերջին մի քանի տասնամյակների ընթացքում նշանակալի դրամատիկ զարգացում է ապրել: «Տեխնոլոգիաների ներդրմամբ, մարդկանց և առողջապահական խնդիրների լուծմամբ այսօր այստեղ ենք: Այս տեխնոլոգիաները զարգանում են, և այն համակարգը, որն ունենք այսօր և ունենալու ենք 15 տարի հետո, պիտի տարբերվի»,- ասաց Ս. Խաչատրյանը` հավելելով,որ շատ հետքրքիր պատասխաններ կհնչեն:
Տեղեկացնենք, որ կոնգրեսը կտևի 2 օր, որի ընթացքում կլինեն պլենար և գիտական նիստեր, փորձագիտական քննարկումներ և կլոր սեղաններ, կլինեն հիմնարար դասախոսություններ` տելեառողջապահության համաշխարհային ճանաչում ունեցող 15 փորձագետների կողմից: Նախատեսվում են նաև կրթական ուղվածության միջոցառումներ և միջազգային ձեռնարկությունների ցուցահանդես: