Ռուսական Regnum լրատվական գործակալության փոխանցմամբ՝ Թուրքիայի եվրոպական հարցերով պետնախարար, ԵՄ-ին Թուրքիայի անդամակցության գծով գլխավոր բանագնաց Էգեմեն Բաղըշը քննադատել է չորեքշաբթի երեկոյան Եվրահանձնաժողովի հրապարակած՝ ԵՄ-ի ընդլայնման մասին հերթական տարեկան զեկույցը, որը Բրյուսելում ներկայացրել է ԵՄ-ի ընդլայնման հարցերով ԵՄ-ի կոմիսար Շտեֆան Ֆյուլեն։
Բաղըշը հայտարարել է. «Մեր միակ նպատակը ԵՄ-ին լիիրավ անդամակցությունն է, այլ նպատակներ մենք չենք հետապնդում։ Անընդունելի է ազգային փոքրամասնությունների հանդեպ Թուրքիայի վարած քաղաքականության քննադատումը Բրյուսելի կողմից։ Ժամանակն է, որ Եվրոպան փոխի իր դիտանկյունը։
Իսրայելն ու Եվրոպայի մի շարք շրջանակներ այդ թեման օգտագործում են «Տրոյական ձիու» տեղ։ Թուրքիան ներկայումս «ավելի քան երբևէ» ցանկանում է միանալ ԵՄ-ին (դրա համար էլ բանտերում գտնվող լրագրողների քանակով աշխարհի բացարձակ առաջատարն է.- 1in.am)»։
Հիշեցնենք, որ 1999 թվականի դեկտեմբերի 10-ին ԵԽ-ի` Հելսինկիում տեղի ունեցած գագաթնաժողովում Թուրքիային շնորհվեց ԵՄ-ին անդամակցելու թեկնածու երկրի կարգավիճակ:
2004 թվականի դեկտեմբերին Բրյուսելում անցկացված ԵԽ համաժողովում միաձայն որոշվեց Թուրքիայի հետ բանակցություններ սկսել 2005 թվականի հոկտեմբերի 3-ին: Այդ օրը ԵՄ անդամ երկրները Լյուքսեմբուրգում երկարատև քննարկումներից հետո ընդունեցին Թուրքիայի հետ բանակցություններ սկսելու որոշում:
Ի դեպ, Եվրահանձնաժողովի հրապարակած այս տարվա զեկույցը 14-րդն էր Թուրքիայի համար։ Առաջին զեկույցը հրապարակվել է 1998 թվականին։
