Նյու Յորքում «Գրավեք Ուոլ Սթրիթը» ակցիայի մասնակիցները չեն պատրաստվում լքել Ներքին Մանհեթենում գտնվող Զուկոտի զբոսայգին, չնայած իշխանությունները կարգադրել էին ազատել այն ուրբաթ առավոտյան այնտեղ մաքրության աշխատանքներ իրականացնելու համար:
Հասարակական այգու սեփականատեր հանդիսացող Brookfield ընկերությունը հայտնել է, որ տեղի ժամանակով ժամը 07:00-ին կսկսի այգու փուլային մաքրման աշխատանքները: Ընկերությունը դիմել էր քաղաքային իշխանություններին`խնդրելով օգնել իրեն այգին ժամանակավորապես ազատել «օկուպանտներից»:
«Վերջին օրերին այգում հակասանիտարական պայմաններ են առաջացել, նրա տարածքը զգալիորեն տուժել է»,- հայտարարել է Նյու Յորքի փոխքաղաքապետ Քես Հոլլոուեյը: Այգին ազատելու խնդրանքով «օկուպանտներին» դիմել է նաև Նյու Յորքի քաղաքապետը:
«Մենք որոշել ենք, որ դուրս չենք գա: Մենք ինքներս էլ կարող ենք մաքրել այգին»,- ասել է ակցիայի մասնակիցներից մեկը: Նրա խոսքով` ոստիկանությունն իրենց շրջանում սկսել է կիրառել «նոր օրենքներ», որոնք ուժի մեջ կմտնեն նախատեսված մաքրության աշխատանքներից հետո: Մասնավորապսս, նրանց կարգելվի իրենց հետ բերել քնապարկեր, ներքնակներ, պառկել և քնել այգում, ինչպես նաև այգու տարածքում անձնական իրեր պահել:
Քաղաքի ոտիկանապետը հաստատել է, որ մաքրությունից հետո ակցիայի մասնակիցները կարող են վերադառնալ այգի, բայց՝ առանց անձնական իրերի:
ԱՄՆ-ում «Գրավեք Ուոլ Սթրիթը» ակցիան շարունակվում է արդեն մեկ ամիս: Նրա մասնակիցները բողոքում են ԱՄՆ ֆինանսական ինստիտուտների չարաշահումների դեմ: