Տավուշի մարզում սողանքի հետևանքով զոհված քաղաքացիներից շատերի ընտանիքները նրանց հուղարկավորելու հնարավորություն չունեն, բայց ոչ մի աջակցություն չեն ստանում:
Հիշեցնենք, որ հոկտեմբերի 2-ին, ժամը 19:03-ին միջպետական մայրուղու 83-րդ կիլոմետրում Վանաձոր-Բագրատաշեն հատվածում` Այրում երկաթուղային կայարանի կամրջի մոտ (Լճկաձոր գյուղի հատվածում) տեղի է ունեցել սողանք: 130 մ երկարությամբ և 60 մ բարձրությամբ հողազանգվածը լցվել է ավտոճանապարհին և այն ամբողջովին դարձրել անանցանելի: Տեղում պարզվել է, որ փլվածքի տակ է մնացել տարբեր մակնիշի 35 մեքենա: Սողանքի հետևանքով 5 քաղաքացիներ զրկվեցին կյանքից, որոնցից երկուսը եղբայրներ էին` չհաշված տեխնիկական և նյութական վնասները:
Մինչ օրս հետսողանքային աշխատանքները շարունակվում են: Բայց աղետից հետո ո՛չ Սերժ Սարգսյանը, ո՛չ վարչապետը հարկ չհամարեցին իրենց ցավակցական խոսքը հղել կատարվածի կապակցությամբ: Ավելին՝ կառավարությունը մինչ այսօր ոչ մի օգնություն և փոխհատուցում չի տրամադրել սողանքի գոտուց տուժածներին և նրանց հարազատներին, չնայած այդ հատվածը պետության վերահսկողության տակ է, և նրանք պետք է վերացնեին սողանքի գոտու ռիսկերը կամ ծայրահեղ դեպքում փոխհատուցում, օգնություն տրամադրեին տուժածների ընտանիքներին: Իսկ չարված աշխատանքների արդյունքում սողանքի գոտում զոհվածների հարազատները իրենց սուգը թողած` ընկել են պետական մարմինների դռները` հուղարկավորության միջոցներ հայթայթելու համար:
Օրինակ` զոհված եղբայրների՝ 1973թ. ծնված Արմեն և 1964թ. ծնված Մեխակ Սորսումատյանների քույրը` Դուխիկը, ստեղծված իրավիճակից դուրս գալու համար դիմել է ԱԺ պատգամավոր Անահիտ Բախշյանի օգնությանը, որ միջնորդի պետական այրերին եղբայրների հուղարկավորությունը կազմակերպելու համար: Վերջինս դիմել է Առողջապահության նախարարություն, որի աջակցությամբ Նոյեմբերյանից դիակը բերել են Միքայելյանի անվան հիվանդանոցի դիահերձարան և կազմակերպել դիահերձումը: Դագաղների գումարը՝ 90 հազար դրամ, տվել է նրանց երրորդ եղբայրը:
Քանաքեռ-Զեյթուն համայնքի վարչական շրջանի ղեկավար Արայիկ Քոթանջյանը կազմակերպել է Միքայելյանի անվան հիվանդանոցի դիահերձարանից դիակի տեղափոխումը տուն և գերեզման: Տվյալ ընտանիքում միայն 10 երեխա կա` գումարած կանայք: Ավագ եղբայրը 7 երեխա ունի, իսկ կրտսերը` 3: Այս ընտանիքի բնակարանային պայմաններն այնքան անտանելի էին, որ նույնիսկ դագաղը դնելու տեղ չի եղել:
Հիշեցնենք, որ անհետ կորածների թվում են 1973թ. ծնված Արմեն և 1964թ. ծնված Մեխակ Սորսումատյան եղբայրները, Լճկաձորի բնակիչ, 1939թ. ծնված Նորիկ Միրզոյանը, Արթուր Գուրգենի Հակոբյանը (1992թ. ծնված, Վրաստանի քաղաքացի), Գուրգեն Մովսեսի Հակոբյանը (1949թ. ծնված, Վրաստանի քաղաքացի): Երեկ ժամը 17.00-ի դրությամբ Տավուշի մարզում տեղի ունեցած սողանքային գոտում դեռևս աշխատում էին 16 փրկարարներ` Տավուշի մարզից և 20` ՀՀ ԱԻՆ ՀՓԾ փրկարարական ուժերի վարչությունից: Տեղում շարունակում են հերթապահել մարզային ոստիկանության 13 աշխատակից և շտապօգնության 1 բրիգադ: Մարզում տեղացող անձրևի պատճառով ժամը 17.30-ին աշխատանքները դադարեցվել են, սակայն այսօր կրկին կշարունակվեն:
Լուսանկարը՝ news.am-ի