Այսօր ԱՄՆ դեսպանատանը տեղի ունեցավ ԱՄՆ հյուպատոս Ռոբերտ Ֆարքուհարի մամլո ասուլիսը:
Պատասխանելով լրագրողների այն հարցին, թե, կապված «Բազմազանության արտոնագիր» վիճակախաղի խաղարկության գրանցման գործընթացի հետ, նախորդ տարի Հայաստանից քանի մարդ է ստացել Green card-ի կարգավիճակ` Ռոբերտ Ֆարքուհարը պատասխանեց. «Ամեն տարի թիվը մոտավորապես նույնն է` 2011-ին` 1200, 2012-ին` մոտ 1000»:
Արդյո՞ք կեղծ փաստաթղթերի ներկայացման թիվը մեծ է Հայաստանից, և եղե՞լ են վտարման փաստեր` հետաքրքրվեցին լրագրողները. «Կեղծիքի դեպքեր հայտնաբերվում են, բայց հաճախակի չի լինում: Ինչ վերաբերում է ԱՄՆ-ից արտաքսման հայերի մասին տեղեկություններին` ես ցավոք չունեմ, այդ տվյալներին տիրապետում է ԱՄՆ ազգային անվտանգության դեպարտամենտը»:
Ո՞ր երկրների քաղաքացիները չեն կարող մասնակցել խաղարկությանը` հյուպատոսին հարց ուղղեցին լրագրողները. «Թե քանի երկրներ են իրավասու մասնակցել` ես ստույգ չգիտեմ, սակայն թե ինչպես է որոշվում իրավասությունը, ապա տեղեկացնեմ, որ, եթե վերջին հինգ տարիների ընթացքում որևէ երկրից ԱՄՆ ներգաղթողների թիվը գերազանցում է 50 000-ը, ապա այդ երկիրը իրավասու չէ մասնակցել տվյալ տարվա խաղարկությանը»:
Ի՞նչ տվյալներ կան Խորհրդային Միության երկներից ԱՄՆ ներգաղթողների թվերի մասին՝ հյուպատոսին հարց ուղղեցին լրագրողները: «2011 թվականի խաղարկությանը ՌԴ-ից 2400 հոգի է ստացել մուտքի արտոնագիր, Վրաստանից` մոտ 700 հոգի, Ադրբեջանից` 350 հոգի»,- տեղեկացրեց Ռոբերտ Ֆարքուհարը: