Քաղաքական և միջազգային հետազոտությունների հայկական կենտրոնը՝ ԱՄՆ ժողովրդավարական ինստիտուտի հետ համատեղ, այսօր քաղաքական քննարկում է կազմակերպել` նվիրված ընտրությունների ժամանակ հաճախ կիրառվող և բազմիցս քննադատված մեթոդին` ընտրակաշառքին:
Քննարկման մասնակից ԱԺ պատգամավոր ՀՅԴ անդամ Արծվիկ Մինասյանի կարծիքով՝ հարցը հրատապ է ոչ միայն Հայաստանում, այլև զարգացած երկրներում, և պարբերաբար տարբեր սրությամբ դրվում է, պարզապես ՀՀ-ում ավելի սուր է, քանի որ բարեգործության որևէ օժանդակության անվան տակ իրականացվում է ընտրողի ձայնի գնում: Նա փաստեց, որ երևույթը նոր չէ մեր իրականության մեջ և շեշտեց, որ պետք է պայքարել ընտրական գործընթացներում ընտրողի ազատության իրավունքի համար:
Ըստ Մինասյանի՝ թեև Ընտրական օրենսգրքի 18-րդ հոդվածն արգելում է թեկնածուներին կամ նրանց մտերիմներին որևէ արժեք տալ, կամ բարեգործություն անել, սակայն օրենսդրական ձևակերպումները խիստ թերի են, և պրակտիկայում կիրառությունը բարդություն է հարուցում: Ըստ պատգամավորի, օրենսդրական ճշգրտումների կարիք կա. «Ունենք օրենսդրական բաց, որին էր ուղղված ՀՅԴ-ի և «Ժառանգության» համատեղ 11 պահանջներից մեկը, որ ներկայացվել էր Վենետիկի հանձնաժողովին: Ցավոք, հաջողություն չունեցանք»: Ա. Մինասյանը հայտնեց, որ իրենք պահանջում էին, որպեսզի ընտրության օրվան նախորդող 3 օրերի ընթացքում արգելվի ցանկացած բարեգործություն:
Ա.Մինասյանը նկատեց, որ երբ վարչապետն այցելում է մարզեր և զուգահեռ որևէ երիտասարդի խրախուսում է իր աշխատանքի համար, ու տալիս ՀՀԿ անդամի տոմս, ապա դա ընտրակաշառք է: «Օրենքը պետք է փոփոխվի»,- հայտարարեց Ա.Մինասյանը:
ԱԺ «Ժառանգություն» խմբակցության քարտուղար Լարիսա Ալավերդյանը հայտարարեց, որ միանշանակ մերժում է ընտրակաշառքը «ազգային մենթալիտետով» պայմանավորելը. «Սա ազգի հոգեկերտվածքից բխող երևույթ չէ, և դա փակուղի է տանում: Բոլորովին այլ վայրերում պետք է փնտրել պատճառները»:
Լ. Ալավերդյանի կարծիքով՝ նախևառաջ պատճառները հարկավոր է քաղաքական էլիտաների շրջանում փնտրել: Նրա խոսքով, դա փաստել է նաև ՀԲ-ն, որը նշել է, որ ԽՍՀՄ փլուզումից հետո քաղաքական էլիտաները որոշ երկրներում չկարողացան հաղթահարել գայթակղությունը և չկարողացան շարժվել ազգային գաղափարներով ու շահերով:
ՕԵԿ ներկայացուցիչ Մարզպետունի Մանուկյանը նշեց, որ բարեգործություն պետք է արվի ընտրության հաջորդող օրերին. «Ընտրակաշառքը չպետք է նույնացնել բարեգործության հետ: Սա օրենքով պետք է հստակեցվի և ամրագրվի»: Նա ներկայացրեց, որ, օրինակ, Արցախում հաղթահարել են ընտրակաշառքի խոչընդոտը, և ընտրական գործընթացը ԼՂՀ-ում կայացած է. «Ինձ թվում է, որ, եթե մեր եղբայրները կարողացել են հաղթահարել դա, մենք նույնպես կկարողանանք»: