Խորվաթիայի Դուբրովնիկ քաղաքում տեղի ունեցած ԵԱՀԿ ԽՎ-ի ՀՀ ԱԺ պատվիրակության անդամ, ԱԺ ՀՀԿ խմբակցության պատգամավոր Արտակ Դավթյանն այսօր լրագրողների հետ հանդիպման ժամանակ, խոսելով ԵԱՀԿ Խորհրդարանական վեհաժողովի ընթացքից, նշեց, որ հետաքրքիր էր այն հաջորդականությունը, որով ելույթ ունեցան ԵԱՀԿ ՄԽ համանախագահները. «Ոչ թե ելույթները եղան Պոպով, Ֆասիե, Բրադտկե հերթականությամբ, այլ Ֆասիե, Բրադտկե, Պոպով: Ներկայացնելու ու հարցերին պատասխանելու առումով առավել ակտիվ էր հենց ֆրանսիացի համանախագահ Ֆասիեն»:
Դավթյանը նշեց, որ շատ կարևոր շեշտադրումներ էին տեղի ընտրության հարցը և այն համեմատությունները, որոնք արել են համանախագահները: Դավթյանը նկատեց, որ Բալկաններում գոյություն ունեցող բոլոր ինքնավար կազմավորումներն այսօր ինքնավար պետությունների կարգավիճակ ունեն, ինչպես նաև համեմատություն է կատարվել Բալկանների և Հարավային Կովկասի միջև:
ՀՀԿ-ական պատգամավորն առանձնացրեց ամերիկացի համանախագահ Բրադտկեի խոսքերը, ով նշել է, որ այն երեք հանրաճանաչ սկզբունքները, որոնք այսօր առկա են բանակցային սեղանին, մենյու չեն, որ ինչ ուզենան` նա էլ ընտրեն, այլ մեկ ամբողջություն են կազմում, և դա պետք է բոլորը հասկանան:
Դավթյանը կարևորեց նաև այն հանգամանքը, որ Բրադտկեն անթույլատրելի է համարել Թուրքիայի ակտիվ մասնակցությունը ԼՂ հարցի կարգավորմանը:
Նա նաև խոսեց այն մասին, թե ինչպես է ԼՂ հակամարտությունը ներկայացրել ֆրանսիացի համանախագահը. «Նա հակամարտությունն ու իրենց աշխատանքը բաժանեց երեք մասի` մինչև 98 թ., երբ աշխատանքը կատարվում էր ռեինտեգրացիայի ուղղությամբ, այսինքն Ադրբեջանի կազմում Ղարաբաղին բաձր կարգավիճակ շնորհելու առումով, այնուհետև Ղարաբաղի անկախ կարգավիճակը, և 2000 թ. կեսերին սկսվել են սկզբունքների հետ կապված աշխատանքները, ինչը շարունակվում է նաև այսօր»:
Պատվիրակության ՕԵԿ-ական անդամ Խաչիկ Հարությունյանն էլ նշեց, որ իրենց թիմը շատ միասնական է աշխատել, և տեղեկացրեց, որ իրենց է միացել նաև Վիեննայում ԵԱՀԿ Հայաստանի ներկայացուցիչ Վահե Գևորգյանը, ով բավականին մեծ ու արդյունավետ աշխատանք է կատարել: Նա նկատեց, որ հիմնական դիտարկումներից ակնհայտ էր դառնում, որ խնդրի կարգավորմանը խանգարում է Ադրբեջանը:
