Գերմանիայի կանցլեր Ֆրիդրիխ Մերցը հայտարարել է, որ Անկարայում անցկացվող ՆԱՏՕ-ի գագաթնաժողովը նոր շունչ կհաղորդի դաշինքին և կնպաստի դրա ամրապնդմանն ու համախմբմանը։
Այս մասին հայտնում է «Անադոլու» լրատվական գործակալությունը։
ՆԱՏՕ-ի 36-րդ գագաթնաժողովի հիմնական նիստից առաջ լրագրողների հետ զրույցում Մերցը շնորհակալություն է հայտնել Թուրքիայի նախագահ Ռեջեփ Թայիփ Էրդողանին՝ հյուրընկալության և գագաթնաժողովի բարձր մակարդակով կազմակերպման համար։ Նա հիշեցրել է, որ նախորդ տարի Հաագայում ընդունվել էր պաշտպանական կարողությունների զգալի ընդլայնման մասին որոշում, և հավելել, որ այդ պարտավորություններն արդեն իրականացվում են։
Մերցի խոսքով՝ Եվրոպական միության և ՆԱՏՕ-ի անդամ երկրների մեծ մասը զգալիորեն ավելացրել են պաշտպանական ծախսերը։ Նա ընդգծել է, որ դաշինքի անդրատլանտյան բնույթը պահպանելու համար անհրաժեշտ է ՆԱՏՕ-ն դարձնել «ավելի եվրոպական»։ Որպես համագործակցության օրինակ՝ Գերմանիայի կանցլերը նշել է Գերմանիայի, Նորվեգիայի և Կանադայի համատեղ ծրագիրը՝ սուզանավերի արդիականացման ուղղությամբ։
«Սա տասնամյակներով կամրապնդի մեր համագործակցությունն ամբողջ Ատլանտյան տարածաշրջանում»,- ասել է նա։
Մերցը հայտնել է նաև, որ գագաթնաժողովում կքննարկվեն համատեղ պաշտպանական նախաձեռնությունների հետագա զարգացումը և վստահություն հայտնել, որ Անկարայի հանդիպումը նոր շունչ կհաղորդի ՆԱՏՕ-ին՝ դարձնելով այն ավելի ուժեղ և ավելի միասնական։
Կանցլերը նշել է, որ օրակարգում ընդգրկված է նաև Ուկրաինային աջակցելու հարցը՝ ընդգծելով, որ Բեռլինը շարունակելու է աջակցել Կիևին։
Նրա խոսքով՝ Եվրոպան նախաձեռնել է ծրագիր, որի շրջանակում 2026 և 2027 թվականներին Ուկրաինային տարեկան կտրամադրվի 70 միլիարդ եվրոյի աջակցություն։
«Այժմ այս պատերազմի ավարտը կախված է միայն Ռուսաստանից։ Ռուսաստանը հնարավորություն չունի հաղթելու այս պատերազմում և չի հասնի իր ռազմական նպատակներին։ Որքան շուտ ավարտվի պատերազմը, այնքան լավ կլինի Եվրոպայի, Ռուսաստանի և ամբողջ աշխարհի համար»,- հայտարարել է Մերցը։
