Մայքլ Ջեքսոնի մահվան գործով դատավարության ժամանակ սրտաբան Ալոն Շտեյբերգը հայտարարել է, որ անհրաժեշտ միջոցներ ձեռնարկելու դեպքում երգչին «հնարավոր էր փրկել»:
Ջեքսոնը մահացել է 2009 թվականի հունիսի 25-ին Լոս Անջելեսում: Երգչի մահվան մեջ մեղադրվում է նրա բժիշկը` Կոնրադ Մյուրեյը: Ըստ հետաքննության` նա Ջեքսոնին տվել է պրոպոֆոլի մեծ չափաբաժին, որը ռեակցիայի մեջ է մտել այլ դեղերի հետ` հանգեցնելով մահվան:
Ինչպես հաղորդում է Agense France Presse-ը, սրտաբանը պատմել է, որ Մյուրեյը սենյակից դուրս է եկել երկու րոպեով, իսկ երբ վերադարձել է, երգչին արդեն մահացած է գտել: Սակայն սրտաբանը նշել է, որ այդ ժամանակ երգիչը դեռ ուներ «արյան ճնշում, զարկերակ, սիրտը դեռ բաբախում էր», և եթե անհրաժեշտ բժշկական օգնություն ցուցաբերվեր, «նրան, անկասկած, հնարավոր կլիներ փրկել այդ պահին»:
Սրտաբանի խոսքով` Ջեքսոնի բժիշկը «լուրջ անփութություն» է ցուցաբերել` անմիջապես շտապ օգնություն չկանչելով: Նա նշել է, որ Ջեքսոնի սիրտն այն ժամանակ կանգ չէր առել, նա պարզապես դադարել էր շնչել, ուստի Մյուռեյի կողմից սրտի մերսումը անօգուտ է եղել, և դա «աններելի» սխալ է նրա կողմից:
Բժիշկը նաև տեղեկացրել է, որ պրոպոֆիլը, որն ընդունում էր Ջեքսոնը, անքնության դեմ լավագույն միջոցը չէ:
Մյուրեյի մեղքն ապացուցվելու դեպքում նրան սպասվում է մինչև 4 տարվա ազատազրկում: