Այսօր տեղի ունեցավ 1920թ. հիմնված, սակայն այս տարվա ապրիլ ամսից իր դռները փակած «Նաիրի» կինոթատրոնի վերագործարկման արարողությունը՝ Հայաստանի ազգային կինոկենտրոնի, Ազգային կինոյի զարգացման հիմնադրամի ջանքերով: Բացումը կատարվեց ռեժիսոր Էդգար Բաղդասարյանի «Սուրբ ծեսերի երկիրը» կինոնկարով: Կինոթատրոնի վերագործարկմանը աջակցել են Մշակույթի, ԿԳ նախարարությունները, Երևանի քաղաքապետարանը:
Ռեժիսոր Արսեն Առաքելյանը մեզ հետ զրույցում, կարևորելով կինոթատրոնների առկայությունը, հատկապես «Նաիրի» կինոթատրոնն առանձնացրեց, քանի որ մարդիկ, նրա խոսքերով, լավ հիշողություններ ունեն այս կինոթատրոնի հետ: Նա նաև նշեց, որ Հայաստանի ազգային կինոկենտրոնն է զբաղվելու ծրագրային քաղաքականությամբ, ինչն էլ արդեն իսկ հուշում է, որ ֆիլմերի ընտրության հարցում այլ մոտեցում կլինի. «Կինոթատրոնները պետք է շատ լինեն, բայց և պետք է տարբեր լինեն իրենց ծրագրային քաղաքականությամբ և առանձնահատկությամբ»,- ավելացրեց ռեժիսորը:
«Նաիրի» կինոթատրոնի ծրագրերի տնօրեն Հովհաննես Գալստյանը նշեց կինոթատրոնի ծրագրային առանձնահատկությունները, ըստ որի` կինոթատրոնը օրական վեց սեանս կունենա, որից երեք սեանսը ցերեկային՝ դպրոցականների և մանուկների համար, կցուցադրվեն խորհրդային արտադրության ֆիլմեր, որից հետո՝ հայկական ֆիլմեր, իսկ արդեն երեկոյան 21:30-ին՝ մեծ «վարպետների» նոր ֆիլմեր կցուցադրվեն, այդ թվում` Վուդի Ալենի, Ալմոդովարի և այլոց ֆիլմերը:
Հայաստանի ազգային կինոկենտրոնի տնօրեն Գևորգ Գևորգյանը իր խոսքում նշեց, որ իրենք մի ծրագիր են կյանքի կոչել, որի միջոցով հնարավոր կլինի հանրությանը հաղորդակից դարձնել Հայաստանի և աշխարհի կինոնորույթներին:
Ռեժիսոր Էդգար Բաղդասարյանը, ողջունելով այս նախաձեռնությունը, նշեց, որ այսօր շուկայական հարաբերությունների պայմաններում շատ դժվար է մոտենալ արվեստին, շատ դժվար է այսօր արվեստագետի համար ասել այն, ինչ ուզում է: