Ադրբեջանական Salam News գործակալության փոխանցմամբ՝ ԵՄ-ի արտաքին հարաբերությունների և անվտանգության քաղաքականության հարցերով գերագույն հանձնակատար Քեթրին Էշթոնը մտահոգություն է հայտնել Ադրբեջանում խաղաղ ցուցարարներին ազատազրկելու կապակցությամբ։
Էշթոնը նշել է, որ չնայած այս տարի ԵՄ-ի բազմաթիվ հայտարարություններին՝ հոկտեմբերի 10-ին ևս չորս խաղաղ ցուցարար ազատազրկման դատապարտվեց, ինչի արդյունքում դատապարտված ցուցարարների թիվը հասավ 14-ի.
«ԵՄ-ը վերահաստատում է հիմնական ազատությունների ապահովմանն իր կարևորություն տալը։ Դրանում ներառվում է նաև իր գործընկեր երկրներում ազատ արտահայտվելու ու ազատ հանրահավաքներ անցկացնելու ապահովումը»։
Էշթոնը վերստին Ադրբեջանի իշխանություններին կոչ է արել ապահովել արդար, թափանցիկ բողոքարկման գործընթաց՝ հավելելով, որ ԵՄ-ը պատրաստ է ժողովրդավարական բարեփոխումների հարցում աջակցել Ադրբեջանին։
