«Ժողովուրդ» օրաթերթը տեղեկացնում է, որ օրաթերթի դեմ 2 դատական հայց է ներկայացվել:
Հայաստանում գործող անկախ թերթերին ֆինանսապես ճնշելու հերթը հասել է «ժողովուրդ» օրաթերթին: «Առավոտ» օրաթերթի երեկվա համարից տեղեկացանք, որ Գեղարքունիքի մարզպետ Նվեր Պողոսյանն արդեն իսկ դատական հայց է ներկայացրել «Ժողովուդ»-ի դեմ (խմբագրությունը դեռ պաշտոնապես չի ծանուցվել այդ մասին): Մարզպետը որոշեց այդ քայլին դիմել այն բանից հետո, երբ «Ժողովուրդ» օրաթերթի հոկտեմբերի 7-ի համարում տպագրված «Մարզպետը կաշառք է վերցրել»» նյութում մարզի Թթուջուր գյուղի բնակիչ Աննա Թորոսյանը պնդում էր, որ մարզպետը իր վարորդի միջոցով 3000 դոլար կաշառք է վերցրել` նույն գյուղի դպրոցում պատմության ուսուցչի թափուր տեղի մրցույթում մյուս թեկնածուի հաղթանակն ապահովելու համար:
Թեև նույն հրապարակման մեջ ներկայացված էր նաև մարզպետի տեսակետը, սակայն նախորդող օրերին Ն. Պողոսյանը ջանք ու եռանդ չխնայեց խնդիրը կուսակցականացնելու և իրեն ԲՀԿ-ի օմբուդսմենի կարգավիճակ վերապահելու համար: Հաշվի առնելով, որ Նվեր Պողոսյանը «Բարգավաճ Հայաստան»-ի առանցաքային դեմքերից չէ, վեճի քաղաքականացմանը «Ժողովուրդ»-ը լուրջ չի վերաբերվում` հայտարարելով, որ կաշառքի մեղադրանքը հաստատող ձայնագրությունը խմբագրությունում է և պատրաստ ենք այն տրամադրել պետական ցանկացած ատյանի: Այսպիսով արձանագրում ենք, որ ԲՀԿ-ական մարզպետ Ն. Պողոսյանը ձգտում է համալրել մամուլի դեմ հաշվեհարդար տեսնելու նկրտումներ ունեցող տխրահռչակ չինովնիկների շարքը` բարձրացված աղմուկի մեջ փորձելով սքողել կաշառքի ու Թթուջուր գյուղում այդպես էլ չկայացած ապօրինի մրցույթի խայտառակ պատմությունը: Այնպես որ եթե այս պատմության մեջ կա մեկը, ով պետք է ներողություն խնդրի, ապա դա հաստատ «Ժողովուրդ»-ը չէ:
Բայց սրանով չի ավարտվում «Ժողովուրդ»-ի դեմ սանձազերծված արշավը: Օրերս «Ժողովուրդ» օրաթերթի խմբագրությունը Կենտոն և Նորք-Մաշաշ վարչական շրջանների ընդհանուր իրավասության դատարանից ծանուցում է ստացել այն մասին, որ քաղաքացի Գուրգեն Աղաջանյանը վիրավորվել է ՀՀ պետգույքի կառավարման վարչության նախկին պետ Կարինե Կիրակոսյանի և նույն վարչության պետի տեղակալ Աշոտ Մարկոսյանի մասին արված մեր հրապարակումից և պահանջում է փոխհատուցում` 804 հազար դրամի չափով: Դատական նիստը կկայանա հոկտեմբերի 24-ին:
Նշված հրապարակման մեջ «Ժողովորդ»-ը մեջբերումներ էր արել խմբագրությանը հասցեագրված մի նամակից, որտեղ ՀՀ պետգույքի կառավարման վարչության նախկին պետ, ՀՀԿ-ական Կարինե Կիրակոսյանին և պետի ներկայիս տեղակալ Աշոտ Մարկոսյանին մեղադրանքներ էին ուղղվել: Եվ ահա Գ. Աղաջանյանը որոշել է նրանց երկուսի փոխարեն վիրավորվել ու այսպիսի հայց է ներկայացրել դատարան. «Հոդվածում իմ անունից տարածված տեղեկատվությունը ոչ միայն չի համապատասխանում իրականությանը, այլ նաև դրա հետևանքով արատավորվել է իմ պատիվն ու արժանապատվութունը»:
Ահա թե որ տողերից է վիրավորվել քաղաքացի Գուրեգն Աղաջանյանը. «Կարինեն Աբովյան փողոցի իր բնակարանը ստացել է որպես կաշառք» «7 տարի ղեկավարելով վարչությունը` իր տեղակալ, «գիտնական», կաշառակեր Աշոտ Մարկոսյանի հետ միասին ուղղակի շահեցին պետական ունեցվածքի մի զգալի չափաքանակ», «Կ. Կիրակոսյանն իրեն այդ ոլորտում ավելի ապահով զգալու համար և պետգույքի մի զգալի մասը յուրացնելու նպատակով աճուրդի կենտրոնի տնօրեն է նշանակել իր քեռու տղային` Մարտին Քալաշյանին, ով նույնպես կեղծիքների մեծ վարպետ է»: Բայց նշենք, որ նույն նյութում «Ժողովուրդ»-ը ներկայացրել էր թե Կարինե Կիրակոսյանի, թե վարչության ներկայիս պետ Արման Սահակյանի կարծիքները:
Ավելի ուշ խմբագրություն այցելեց Գուրգեն Աղաջանայնը, որի անունից «Ժողովուրդ»-ը նամակ էր ստացել և հրապարակել: Նա պնդեց, թե ինչքը չէ նամակի հեղինակը: Երբ Աղաջանյանի ցույց տվեցինք «Հայփոստ»-ի միջոցով խմբագրությանն ուղարկված նամակը (նամակի հետադարձ հասցեն Պետգույքի կառավարման վարչությանն է), վերջինս պատճենահանեց նամակն ու ծրարը և հեռացավ: Հաջորդ օրը Աղաջանյանը խմբագրությանը ներկայացրեց մի հերքման տեքստ, որն իրականում հերքում չէր պարունակում, այլ գովեստի խոսքեր` իր հետ խմբագրություն այցելած Ա. Մարկոսյանի հասցեին: և քանի որ տեքստն անհեթեթ էր, հրապարակված նյութի հետ որևէ առնչություն չուներ, ուստի անիմաստ համարվեց այն որպես հերքում ընկալելն ու հրապարակելը :
Չնայած այս զավեշտալի դատական հայցերին, «Ժողովուրդ» օրաթերթը հայտարարում է, որ շարունակելու է հրապարակել քաղաքացիներից ստացված նամակներն ու բանավոր դիմում-բողոքները` հետամուտ լինելով դրանց ընթացքին: Որևէ մեկի ներկայացրած հայցը կամ դրա թիկունքում կանգնած իշխանական ուժերի հնչեցրած սպառնալիքները «Ժողովուրդ»-ին չեն վախեցնելու ու չեն կաշկանդելու: Մենք կշարունակենք աշխատել նույն ոգով` ցանկացած խնդրի վերաբերյալ ներկայացնելով բոլոր կողմերի տեսակետները` բնականաբար պահպանելով նաև անաչառությունը:
