Իրանը փետրվարի 28-ին ամերիկա-իսրայելական ռազմական գործողությունների մեկնարկից ի վեր լուրջ վնասներ է հասցրել Մերձավոր Արևելքում գտնվող 20 ամերիկյան ռազմաբազայի և օբյեկտի՝ զգալիորեն ավելի մեծ վնաս պատճառելով, քան ավելի վաղ հրապարակորեն հայտարարվել էր: Այս մասին հաղորդում է BBC-ն՝ հղում անելով արբանյակային պատկերների վերլուծությանը։
Վերլուծությունը ցույց է տալիս, որ փետրվարի վերջից սկսած՝ Իրանը հարվածներ է հասցրել տարածաշրջանի ութ երկրում, այդ թվում՝ Սաուդյան Արաբիայում, Արաբական Միացյալ Էմիրություններում, Կատարում, Քուվեյթում, Իրաքում, Հորդանանում, Բահրեյնում և Օմանում գտնվող կարևոր ռազմական օբյեկտների։ Մասնավորապես, հսկայական վնաս է հասցվել հակաօդային պաշտպանության ժամանակակից համակարգերին, ռադարներին և տիեզերական կապի համակարգերին, ինչպես նաև զինապահեստներին, նշում է BBC-ն։
Դրա հետ մեկտեղ հրապարակման մեջ ընդգծվում է, որ ամերիկյան օբյեկտներին հասցված վնասի մասշտաբը դժվար է գնահատել։ Պենտագոնի գնահատմամբ՝ «Էպիկական ցասում» գործողության ընդհանուր արժեքը կազմել է 29 միլիարդ դոլար, սակայն այս գումարը, ինչպես կարծում են փորձագետները, զգալիորեն նվազեցված է և հիմնականում վերաբերում է հակամարտության ընթացքում օգտագործված զենքի փոխարինմանը և վերանորոգմանը։
Թեև Սպիտակ տունը բազմիցս հայտարարել է, որ իրանական բանակը գործնականում ոչնչացվել է, վերլուծաբանները նշում են, որ ամերիկյան օբյեկտներին հասցված վնասը վկայում է այն մասին, որ Թեհրանի հակագրոհներն ավելի ճշգրիտ և լայնածավալ էին, քան նախկինում ընդունել էին ԱՄՆ պաշտոնատար անձինք։
Միևնույն ժամանակ BBC-ի փորձագետները նշում են, որ վնասված և ոչնչացված ռազմական թիրախների փաստացի թվաքանակը կարող է ավելի մեծ լինել։ Առանձին վերլուծաբաններ կարծում են, որ տուժած ռազմաբազաների և օբյեկտների թիվը հասնում է 28-ի։
ԱՄՆ պաշտպանության նախարարության ներկայացուցիչը հրաժարվել է մեկնաբանել BBC-ի եզրակացությունները՝ վկայակոչելով «օպերատիվ անվտանգության նկատառումները»։
