Ադրբեջանական APA լրատվական գործակալության փոխանցմամբ՝ հոկտեմբերի 15-ին Վաշինգտոնում տեղի է ունենալու Ղարաբաղյան հակամարտության խաղաղ կարգավորմանը նվիրված սիմպոզիում։
Այն տեղի է ունենալու Ջորջ Մեյսոնի համալսարանում, դրան մասնակցելու են Հայաստանի և Ադրբեջանի պաշտոնատար անձինք։ Սիմպոզիումում ադրբեջանական կողմը ներկայացնելու են արտգործնախարարության մամլո քարտուղար Էլման Աբդուլաևը, Ադրբեջանի նախագահին կից ռազմվարական հետազոտությունների կենտրոնի ղեկավարի պաշտոնակատար Գյուլշան Փաշաևան և ադրբեջանական դիվանագիտական ակադեմիայի ներկայացուցիչ Թալեհ Զիյադովը։
Հայկական կողմը ներկայացված է լինելու ԱԳՆ-ի ներկայացուցիչ Տիգրան Մկրտչյանով և քաղաքացիական հասարակության անդամներով։ Քննարկումների մոդերատորի դերում հանդես է գալու Կարնեգիի խաղաղության հիմնադրամի վերլուծաբան Թոմաս դե Վաալը։
Իսկ հոկտեմբերի 24-ին Ռազմավարական ու միջազգային հետազոտությունների կենտրոնում կայանալու է «Մեծ Կովկաս. հին էթնոքաղաքական հակամարտությունները և նոր աշխարհաքաղաքական համակարգը» խորագրով կոնֆերանսը, որում Հարավային Կովկասում ԵՄ-ի նախկին ներկայացուցիչ Փիթեր Սեմնեբին հանդես է գալու «ԵՄ-ի ռազմավարությունն ու նախագծերը» ելույթով։