Իսրայելական ուժերը մայիսի 19-ին հրետակոծել են Սիրիայի հարավ-արևմուտքում գտնվող Կունեյտրայի նահանգի տարածքները։ Այս մասին հաղորդում է Syria TV-ն։
Հեռուստաալիքի տվյալներով՝ միջադեպը տեղի է ունեցել Կունեյտրայի հյուսիսում գտնվող Տրինջա գյուղի մոտակայքում։ Հրետակոծվել են գյուղատնտեսական տարածքներ, արձակվել է մի քանի հրետանային արկ։
Տուժածների վերաբերյալ տեղեկություններ չեն հաղորդվում։
«Սիջիլ» մարդու իրավունքների կենտրոնը Սիրիայի տարածքում Իսրայելի կողմից կատարված խախտումների ամփոփագրում ապրիլ ամսվա ընթացքում գրանցել է 254 խախտում, որոնց մեծ մասը տեղի է ունեցել Կունեյտրայի նահանգում։
Մայիսի 12-ին Սիրիայի արտաքին գործերի նախարար Ասաադ աշ-Շայբանին էմիրաթական The National թերթի հետ հարցազրույցում հայտարարել էր, որ Սիրիայի իշխանությունները հույս ունեն հաստատել «հանգիստ և կայուն» հարաբերություններ Իսրայելի հետ՝ չնայած հրեական պետության սպառնալիքներին:
2024 թ. դեկտեմբերին Սիրիայի այն ժամանակվա նախագահ Բաշար ալ-Ասադի՝ իշխանությունից հեռանալուց հետո Իսրայելը շարունակում է խախտումներ իրականացնել՝ գրեթե ամեն օր ներխուժելով սիրիական Կունեյտրայի և Դարաայի շրջանների բնակավայրեր։
Ըստ սիրիական կողմի՝ Իսրայելը դիմել է նաև սահմանային շրջաններում ռմբակոծությունների՝ խախտելով միջազգային իրավունքի կանոնները, ՄԱԿ-ի՝ պետական ինքնիշխանության վերաբերյալ բանաձևերը և 1974 թվականին կնքված անջատման մասին համաձայնագիրը, որը բուֆերային գոտի էր ստեղծում երկու երկրի միջև։
