«Հիդրոօդերևութաբանության և մոնիթորինգի կենտրոն» ՊՈԱԿ-ը հայտնել է, որ ապրիլ ամսվա ամենացածր ջերմաստիճանը դիտվել է ամսի 16-ին Աշոցքում՝ -14․4 °C, իսկ ամենաբարձր ջերմաստիճանը ապրիլի 24-ին՝ Մեղրիում՝ 28 °C։
«Ամսական տեղումների առավելագույն քանակը դիտվել է Արագածոտնի և Կոտայքի մարզերի լեռնային շրջաններում՝ կազմելով 130-160 մմ, որը գերազանցել է նորման 1.5-ից 2.5 անգամ։ Տեղումնառատ էր հատկապես ապրիլի 9-13-ը ընկած ժամանակահատվածը, իսկ ապրիլի 13-ին առանձին լեռնային շրջաններում դիտվեց առատ ձյուն։ Համաձայն Արագած բարձր լեռնային օդերևութաբանական կայանի դիտարկումների ապրիլի 22-ին ձյան շերտի բարձրությունը հասել է 336 սմ-ի։
Ջերմաստիճանի կտրուկ նվազում դիտվեց ապրիլի 14-16-ը, երբ հանրապետության շրջանների մեծ մասում օրական ջերմաստիճանները ցածր էին նորմայից 5-7 °C-ով, իսկ ապրիլի 15-ին և 16-ին Արարատյան դաշտում գիշերային ժամերին դիտվեցին բացասական ջերմաստիճաններ։
1935 թվականից իրականացվող դիտարկումների տվյալների համաձայն ամենատաք ապրիլը դիտվել է 2024 թվականին, երբ օդի միջին ամսական ջերմաստիճանը կազմել էր 9․4 °C, իսկ ամենացուրտը՝ 1949 թվականին, երբ օդի միջին ամսական ջերմաստիճանը կազմել էր 1․2 °C։
Ամենախոնավ ապրիլը դիտվել է 1963 թվականին, երբ տեղումների քանակը կազմել էր 144 մմ, իսկ ամենաչորը դիտվել է 2024 թվականին, երբ տեղումների քանակը կազմել էր 23․4 մմ։
Կլիմայի փոփոխության գնահատականները ցույց են տալիս, որ ապրիլ ամսվա միջին ջերմաստիճանը Հայաստանում բարձրացել է 1․8 °C-ով 1935-2026 թթ․ ժամանակահատվածում, իսկ տեղումները նվազել են մոտ 5 %-ով»։
