Ադրբեջանական ANS PRESS-ի փոխանցմամբ՝ երեկ երկօրյա պաշտոնական այցով Ադրբեջան է ժամանել Ավստրիայի նախագահ Հայնց Ֆիշերը։ Հեյդար Ալիևի անվան օդանավակայանում նրան դիմավորել են Ադրբեջանի առաջին փոխվարչապետ Յաղուբ Էյուբովը և այլ պաշտոնատար անձինք։
Ակնկալվում է, որ Ֆիշերը նախ տետ-ա-տետ , ապա երկու երկրների պատվիրակությունների մասնակցությամբ ընդլայնված կազմով հանդիպումներ է ունենալու Ադրբեջանի նախագահ Իլհամ Ալիևի հետ։
Կողմերը քննարկելու են գազային ոլորտում համագործակցության հարցը՝ հաշվի առնելով, որ Ավստրիան Nabucco կոնսորցիումի կարևոր գործընկերներից մեկն է։ Քննարկվելու են նաև Ադրբեջանի եվրաինտեգրման և Ղարաբաղյան հակամարտության կարգավորման հարցերը։ Տնտեսական խնդիրները կքննարկվեն ադրբեջանա-ավստրիական գործարար ֆորումում։
Իր ադրբեջանական այցի շրջանակներում Ֆիշերը նաև հանդիպումներ է ունենալու Ադրբեջանի վարչապետ Արթուր Ռասիզադեի և խորհրդարանի խոսնակ Օգտայ Ասադովի հետ։ Ֆիշերը նաև Բաքվում մասնակցելու է իր հայրենակից Վոլֆգանգ Ամադեուս Մոցարտի հուշարձանի բացման արարողությանը։
