Ուկրաինայի դեմ պատերազմի հինգերորդ տարվա, պատժամիջոցների և տնտեսական դժվարությունների ֆոնին՝ Ռուսաստանում նոր ռեկորդ է սահմանվել միլիարդատերերի թվի և նրանց ընդհանուր կարողության առումով։
Ուկրաինայի դեմ պատերազմի սկսզբից հետո Ռուսաստանում դոլարային միլիարդատերերի թիվն աճել է 26 տոկոսով։ Այս տվյալները ներկայացված են Forbes ամսագրի ռուսական թողարկման 2026 թվականի վարկանիշում։ Ներկայում Ռուսաստանում կա 155 դոլարային միլիարդատեր, մինչդեռ 2021 թվականին՝ պատերազմի նախօրեին, նրանց թիվը 123 էր։ Նրանց ընդհանուր կարողությունը նույնպես հասել է առավելագույնի՝ կազմելով 696,5 միլիարդ դոլար։ Չնայած պատերազմին և պատժամիջոցներին՝ այդ ցուցանիշը մեկ տարվա ընթացքում աճել է 11 տոկոսով։
Այս տարվա ցուցակը գլխավորում է «Սևերստալ» ընկերության ղեկավար Ալեքսեյ Մորդաշովը՝ ընտանիքի հետ միասին։ Նրա կարողությունը գնահատվում է 37 միլիարդ դոլար։ Forbes-ի տվյալներով՝ սա առաջին դեպքն է, երբ ռուս գործարարի կարողությունը գերազանցում է 30 միլիարդ դոլարը։
Երկրորդ տեղում է «Նորնիկել» ընկերության ղեկավար Վլադիմիր Պոտանինը (29,7 միլիարդ դոլար), երրորդում՝ «Լուկոյլ» ընկերության հիմնադիր Վագիտ Ալեքպերովը (29,5 միլիարդ դոլար)։ Լավագույն տասնյակում ընդգրկված են նաև Լեոնիդ Միխելսոնը, Սուլեյման Քերիմովը, Վլադիմիր Լիսինը, Գենադի Տիմչենկոն, Անդրեյ Մելնիչենկոն, Միխայիլ Ֆրիդմանը և Ալիշեր Ուսմանովը։
Ամենահարուստ ռուսաստանցի կինը շարունակում է մնալ «Վայլդբերիզ» առցանց խանութի հիմնադիր Տատյանա Կիմը, որը զբաղեցնում է 23-րդ տեղը՝ 8,1 միլիարդ դոլար կարողությամբ։
