Լիբանանի իշխանությունները ձգտում են ամրապնդել Իսրայելի հետ հրադադարի ռեժիմը և վերականգնել երկրի ամբողջ տարածքի նկատմամբ ինքնիշխանությունը: Ինչպես տեղեկանում է Լիբանանի Ազգային լրատվական գործակալությունից (NNA), այս մասին հայտարարել է Լիբանանի նախագահ Ջոզեֆ Աունը Բեյրութի պատգամավորների պատվիրակության հետ հանդիպման ժամանակ։
«Բանակցություններում Լիբանանի նպատակն է ամրապնդել հրադադարը, ապահովել իսրայելական ուժերի դուրսբերումը գրավյալ հարավային տարածքներից, վերադարձնել պատանդներին և լուծել Լիբանանի և Իսրայելի միջև առկա սահմանային վեճերը», – ասել է նա։
Նրա խոսքով՝ ուղիղ բանակցություններն Իսրայելի հետ նուրբ և կարևոր են, և ազգային պատասխանատվությունը պետք է միասնական լինի առաջիկա փուլում։
Նախագահ Աունը նաև հաստատել է, որ լիբանանյան բանակը հիմնարար դեր կխաղա իսրայելական ուժերի դուրսբերումից հետո, կտեղակայվի հարավային միջազգային սահմանին, և որ օրինական անվտանգության ուժերից բացի այլ զինված ուժեր չեն լինի։
Նա հրադադարը նկարագրել է որպես «բանակցությունների առաջխաղացման դարպաս» և ասել, որ այն ունի ինչպես տեղական, այնպես էլ միջազգային աջակցություն։
Աունը հավելել է, որ Լիբանանը բախվում է նոր իրականության, որին աջակցում են արաբ և միջազգային գործընկերները։
«Մենք չպետք է բաց թողնենք այս հնարավորությունը, քանի որ այն կարող է այլևս չլինել», – ասել է նա։
Պատվիրակության անդամներն իրենց աջակցությունն են հայտնել նախագահի դիրքորոշումներին։
