Apple ընկերությունը մեկ օրվա ընթացքում ընդունել է iPhone 4S նոր սմարթֆոնների մեկ միլիոն պատվեր: Նոր սմարթֆոնները վաճառքի կհանվեն հոկտեմբերի 14-ից, հասանելի կլինեն ԱՄՆ-ում և աշխարհի ևս 6 երկրներում:
iPhone 4S-ը գերազանցել է ավելի քան 15 ամիս առաջ վաճառքի հանված նախորդ մոդելի ռեկորդը: Անցյալ տարի վաճառքի հենց առաջին օրը պատվիրել էին 600 հազար սմարթֆոն:
Ինչպես հաղորեում է ИТАР-ТАСС-ը, ԱՄՆ-ում նոր սմարթֆոնները կարելի է ձեռք բերել բջջային հեռախոսի 3 գլխավոր օպերատորներից (AT&T, Sprint կամ Verizon): Երկու տարվա պայմանագրով սմարթֆոնի արժեքը կազմում է 199-399 դոլար` կախված ֆունկցիաներից և հիշողությունից: Նոր iPhone-ը կներկայացվի 2` սև և սպիտակ գույներով:
Հոկտեմբերի 4-ին այս հեռախոսի ներկայացումը մեծ հիասթափություն առաջացրեց Apple-ի երկրպագուների շրջանում. նոր` 5-րդ սերնդի սմարթֆոնի փոխարեն նրանց առաջարկվում է 4-րդ սերնրի iPhone-ի կատարելագործված տարբերակը:
iPhone 4S-ը Սթիվ Ջոբսի ղեկավարությամբ Apple ընկերության մշակած վերջին հեռախոսն է:
