Հայաստանի Հանրապետական կուսակցության փոխնախագահ Գալուստ Սահակյանը կարծում է, որ «հայ-թուրքական արձանագրությունները պետք է պահել և պահպանել»: Այս մասին նա ասաց «Առաջին լրատվական»-ի հետ զրույցում` անդրադառնալով երկու տարի առաջ Ցյուրիխում ստորագրված փաստաթղթերի հետագա ճակատագրին:
«Արձանագրությունները մեր ունեցած միակ գործոնն են, որոնցով աշխարհին ասում ենք, որ Հայաստանի և Թուրքիայի միջև փակ սահմանները պետք է բացվեն: Սամանի բացումը մեր քաղաքական օրակարգի ամենակարևոր հարցերից է: Միջազգային հանրությունը գնահատում է մեր այս ձգտումը, մինչդեռ Թուրքիան նրա աչքում ոչ վստահելի գործընկերոջ համբավ է ձեռք բերել»,- նկատեց ՀՀԿ փոխնախագահը:
Հիշեցնենք, որ հայ-թուրքական արձանագրությունները ստորագրվել էին 2009 թ. հոկտեմբերին Ցյուրիխում: Թուրքիայի ապակառուցողական դիրքորոշման պատճառով ավելի ուշ դրանց վավերականացման գործընթացը կասեցվել էր: Անկարան 2011 թ. օգոստոսին Թուրքիայի խորհրդարանի օրակարգից հանել էր հայ-թուրքական արձանագրությունները, սակայն շաբաթներ առաջ կրկին վերադարձրել էր իր օրենսդիր մարմին:
