Ադրբեջանական 1news.az-ի փոխանցմամբ՝ ԵԱՀԿ Խորհրդարանական վեհաժողովի նախկին ղեկավար Գորան Լենմարկերը հայտարարել է, որ Ղարաբաղյան հակամարտությունը պետք է կարգավորվի խաղաղ ճանապարհով.
«Որևէ այլընտրանք գոյություն չունի։ Շատ կարևոր է, որ այդ հակամարտությունը կարգավորվի ներկայումս։ Հարևան երկրները, ինչպիսիք են Ադրբեջանն ու Հայաստանը, պետք է փոխզիջման գնան»։
Հիշեցնենք, որ սեպտեմբերի սկզբին էլ Լենմարկերը հայտարարել էր, որ պատերազմ սկսելը հեշտ է, ավարտելն է դժվար. «Հակամարտող կողմերի հասարակական կարծիքին պետք է հասկացնել, որ հակամարտության խաղաղ կարգավորումը պետք է լինի փոխզիջումային։ Կողմերից ոչ մեկի պահանջներն էլ ամբողջովին չեն բավարարվի, սակայն ԵԱՀԿ Մինսկի խմբի կողմից առաջարկված հակամարտության խաղաղ կարգավորումն օգտակար է հակամարտող կողմերի համար։
Օրինակ՝ հարյուր հազարավոր փախստականների ու հարկադիր վերաբնակների վերադարձը։ Նաև կարևոր է, որ նրանք կարողանան այցելել իրենց հարազատների գերեզմաններին։
Այն, որ Ռուսաստանն ակտիվորեն միջնորդում է այս հարցում, դա դրական է, և ես համաձայն եմ, որ ԵՄ-ն իրեն չափազանց պասիվ է պահում։ Եվրոպան ունի իր տիրույթում խաղաղություն կառուցելու, բազմաթիվ պատերազմներից հետո ժողովուրդների միջև բարեկեցություն ու ժողովրդավարություն հաստատելու եզակի փորձ»։
