Այսօր ԳԱԱ պատմության ինստիտուտում տեղի ունեցավ գիտաժողով` նվիրված Վիեննայի Մխիթարյան միաբանության 200-ամյակին:
Գիտաժողովը բացելու պատիվն ընձեռվեց ՀՀ սփյուռքի նախարար Հրանուշ Հակոբյանին, որը, խորին շնորհակալություն հայտնելով ներկաներին, ընդգծեց, որ Միխիթարյան միաբանության հայրերը կարողացել են ստեղծել այնպիսի հոգևոր ու մշակութային արժեքներ, որ զորացրել են հայությանը:
«Նրանք մեր փոքր հոգևոր Հայաստաններն են: Բառերը քիչ են` գնահատելու նրանց արածը: Վենետիկի Մխիթարյան միաբանությունը հայագիտության կենտրոն է, անկրկնելի ֆենոմեն, որ կարողանցավ աշխարհի տարբեր անկյուներում բացել 45 կենտրոններ»,- ասաց Հ. Հակոբյանը` ընդգծելով, որ նրանք իրենց դիվանագիտական կարողությունների շնորհիվ կարողացել են լեզու գտնել Հռոմի պապերի, միապետերի հետ միայն մեկ նպատակով` հզորացնել հոգևոր Հայաստանը:
Սփյուռքի նախարարը «Վիլյամ Սարոյան» մեդալ հանձնեց Պողոս ծայրագույն վարդապետ Գոճանյանին, պատվոգիր` լրագրող Բարբարա Դենշերին (Վիեննա) իր հայանպաստ գործունեության համար:
Այնուհետև ելույթ ունեցավ Նաթան եպիսկոպոս Հովհաննիսյանը` հղելով Գարեգին 2-րդի հայրապետական աղոթքն ու բարեմաղթանքները: ԳԱԱ-ից պատմաբան, ակադեմիկոս Վլադիմիր Բարխուդարյանը, խոսելով Մխիթարյանների անգնահատելի դերի մասին, նկատեց, որ այն երբեք չի եղել միայն կրոնական հաստատություն:
Մխիթարյան միաբանությունը հոգևոր, ուսումնակրթական, գիտական և մշակութային կազմակերպություն է, որը հիմնադրել է Մխիթար Սեբաստացին 1701 թ. Կոստանդնուպոլսում: 1717 թ. միաբանությունը հաստատվել է Վենետիկի մերձակա Սբ Ղազար կղզում. Մխիթարյան է կոչվել Սեբաստացու մահվանից հետո:
