Տաջիկստանի արտաքին գործերի նախարար Սիրոջիդդին Մուխրիդդինը մամուլի ասուլիսում հայտարարել է, որ իր երկիրը ներկայում չի պլանավորում անդամակցել ԵԱՏՄ-ին և BRICS-ին։ Այդ մասին տեղեկանում է «Ինտերֆաքս» գործակալությունից:
«Ներկայում Տաջիկստանի Հանրապետությունը չի քննարկում Եվրասիական տնտեսական միությանը և BRICS-ին միանալու հարցը։ Միևնույն ժամանակ Տաջիկստանը երկկողմ փոխգործակցության շրջանակներում սերտորեն համագործակցում է այդ միավորումների բոլոր մասնակից պետությունների հետ», – հայտարարել է ԱԳ նախարարության ղեկավարը։
Նրա խոսքով՝ Տաջիկստանը նաև չի քննարկում այդ միավորումներին դիտորդի կարգավիճակում մասնակցելու հնարավորությունը։
Եվրասիական տնտեսական միությունը (ԵԱՏՄ) տարածաշրջանային տնտեսական ինտեգրման միջազգային կազմակերպություն է, որը գործում է 2015 թ. հունվարի 1-ից (ստեղծման մասին պայմանագիրը ստորագրվել է 2014 թ. մայիսի 29-ին)։ Միության կազմի մեջ մտնում են Հայաստանը, Բելառուսը, Ղազախստանը, Ղրղզստանը և Ռուսաստանը։ ԵԱՏՄ-ն ապահովում է ապրանքների, ծառայությունների, կապիտալի և աշխատուժի ազատ տեղաշարժը, ինչպես նաև համակարգված տնտեսական քաղաքականության իրականացումը։
BRICS-ը տնտեսական զարգացման և աճի բարձր ներուժ ունեցող պետությունների միավորում է։ Ներկայում դրա կազմի մեջ մտնում է 11 երկիր, այդ թվում՝ Ռուսաստանը, Բրազիլիան, Հնդկաստանը, Չինաստանը, Հարավաֆրիկյան Հանրապետությունը և ուրիշներ։
