Վաղը` հոկտեմբերի 9-ին, Երևանյան 5-րդ միջազգային երաժշտական փառատոնի շրջանակում «Արամ Խաչատրյան» համերգասրահում տեղի կունենա Կոնստանտին Լիֆշիցի (դաշնամուր, Ռուսաստան) մենահամերգը: Հանդիսատեսը համերգի ընթացքում կարող է ունկնդրել Բախի Պարտիտ թիվ 6-ը, բացի այդ՝ նախատեսված են Յակով Յակուլովի «Կարուսել» ստեծագործության համաշխարհային ու Փիթեր Սիբորնի «Աստիճաններ թիվ 2» հատորից հայաստանյան պրեմիերաները:
Հոկտեմբերի 12-ին տեղի կունենա փառատոնի փակման հանդիսավոր արարողությունը: Հանդես կգա Հայաստանի պետական սիմֆոնիկ նվագախումբը` Քրիստոֆեր Ուորեն-Գրինի (Մեծ Բրիտանիա) դիրիժորությամբ: Հանդիսատեսն այդ օրը կկարողանա ունկնդրել մենակատար Եվգենի Սուդբինին (դաշնամուր, Մեծ Բրիտանիա):
Այդ օրը հանդիսատեսի դատին կհանձնվի Շոստակովիչի Տոնական նախերգանքը, Բեթհովենի Դաշնամուրի կոնցերտ թիվ 5-ը, Ստրավինսկու «Հրեղեն հավքը»:
Հիշեցնենք, որ փառատոնը մեկնարկել է սեպտեմբերի 9-ին, այն նվիրվում է Հայաստանի անկախության 20-ամյակին ու Հայաստանի պետական ֆիլհարմոնիկ նվագախմբի հիմնադրման 85-ամյակին: Փառատոնի գեղարվեստական ղեկավարներն են Ալեքսանդր Չաուշյանը (Մեծ Բրիտանիա) և Էդուարդ Թոփչյանը:
