ՀՀՇ վարչության նախագահ Արամ Մանուկյանը կրկին անդրադառնալով իրեն հանձնված ՀՀԿ անդամատոմսերին՝ նշեց, որ այդ տոմսերը հանձնողները հանգստանում են, թեթևանում են և գրկախառնվում են իր հետ: Նա նշեց, որ Ազատության հրապարակը դարձել է մաքրման վայր:
Մեկ հայտարարություն էլ արեց Տիգրան Առաքելյանի անունից՝ նշելով, որ նա դիմել է իր բոլոր ընկերներին ու հարազատներին՝ մասնակցել վաղվա հանրահավաքին:
Մյուս հայտարարությունը Մանուկյանն արեց լրատվամիջոցների համար՝ նշելով, որ Վանուշ Խանամիրյանի թաղումը կազմակերպող հանձնաժողովը իրեն էլ է հրավիրել մասնակցելու քննարկմանը: Մանուկյանը նշեց, որ եղել է առաջարկ, որ Խանամիրյանի աճյունը Օպերայից տանեն հուղարկավորության, ինչին ի պատասխան ինքը և Լևոն Զուրաբյանն ասել են, որ իրենք պատրաստ են ճանապարհ բացելու, քանզի Խանամիրյանը հայ ժողովրդի կողմից սիրված վաստակավոր գործիչ է. «Ցավոք սրտի, որոշ լրատվամիջոցներ, որոշ մարդիկ տարածեցին, թե ՀԱԿ-ը խոչընդոտել է Օպերայից կազմակերպելու Խանամիրյանի հուղարկավորության արարողությունը և նրան տեղափոխել են Ֆիլհարմոնիայի դահլիճ»:
Մանուկյանը կոչ արեց մեկ րոպե լռությամբ հարգել մաեստրո Վանուշ Խանամիրյանի հիշատակը և վաղը՝ ժամը 2-ին մասնակցել հուղարկավորությանը:
Մանուկյանը նաև կոչ արեց վաղը կիրառել «+5» տարբերակը՝ նշելով, որ վաղվա հանրահավաքը կարևոր է. «Հաղթանակ և հաջողություն մեր հավաքականին և մեզ»:
Այս պահին Ազատության հրապարակում հավաքվածները դիտում են Հայաստան-Մակեդոնիա ֆուտբոլային հանդիպումը:
