Արցախում աշխատանքներ են տարվում Տեղեկատվական տեխնոլոգիաների կենտրոն ստեղծելու ուղղությամբ: «Առաջին լրատվական»-ի հետ զրույցում ԼՂՀ տնտեսական զարգացման նախարար Կարեն Եսայանը հայտնեց, որ կենտրոնը երկու խնդիր պետք է լուծի՝ պետք է իրականացնի բիզնես ինկուբատորի գործառույթները և ստեղծի ուսումնական կենտրոն, որտեղ արցախցիները կարող են վերապատրաստվել և բիզնես ինկուբատորի միջոցով կենտրոն մուտք գործած ընկերություններում ընդգրկվել աշխատանքի:
«Կենտրոնը դեռևս նախագծման փուլում է: Այսօր ևս մեկ անգամ հնարավորություն է ընձեռվել ճշտել, ստուգել այս պրոյեկտի պահանջված լինելը: Այս ցուցահանդեսը ևս վկայությունն է, որ մենք ճիշտ ճանապարհին ենք»,- ասաց Կ. Եսայանը:
Նա նշեց, որ արդեն տարածք է հատկացվել Ստեփանակերտի կենտրոնում, ներկայումս կատարվում են վերանորոգման աշխատանքներ, որոնք ավարտելուց հետո այն ամբողջությամբ կհագեցվի անհրաժեշտ նորագույն սարքավորումներով: Ըստ Կ. Եսայանի՝ կենտրոնը կգործի 2012 թ. տարեվերջից:
ՏՏ կենտրոնը ինկուբատորի դերակատարություն կունենա`տրամադրելով գրասենյակային և այլ տարածքներ, որոնք հագեցած կլինեն անհրաժեշտ սարքավորումներով, ինչպես նաև դրամաշնորհներ։ Նախատեսվում է, որ սկսնակ ընկերությունները հաջող ընթացքի պարագայում 1-3 տարվա մեջ դուրս կգան ինկուբացիոն շրջանից և իրենց տեղը կզիջեն նոր ընկերությունների։ Ներդրումների որոշակի հատվածը, ըստ նախնական պայմանավորվածության, կատարելու են Մոսկվայի հայ գործարարները:
