Թուրքական Samanyolu Haber կայքի փոխանցմամբ՝ Թուրքիայի արտգործնախարար Ահմեդ Դավութօղլուն հայտարարել է, որ երեք պատճառներով Թուրքիայում բացառվում է «Արաբական գարունը».
ա) Թուրքիան իր գարունը վերապրել է 1940-ական թվականների վերջին, երբ անցում կատարեց ժողովրդավարության (1946 թվականին Թուրքիայում ներդրվել է բազմակուսակցական համակարգը.- 1in.am)։
բ) Թուրքիան 1980-ական թվականներից ի վեր իր գարունը վերապրեց տնտեսական ոլորտում՝ անցում կատարելով ժամանակակից տնտեսության։
գ) Թուրքիան վերջին ժամանակաշրջանում, վերստին այս ամենն իրականացնելով, վերապրեց իր գարունը։
Դավութօղլուն նաև ի ցույց է դրել նախքան «Արաբական գարուն» վերապրելը արաբական երկրներում առկա թերությունները` դրանք Թուրքիայի օրինակով տարանջատելով 3 կատեգորիայի.
ա) արաբական երկրներում մարդիկ չեն ընտրում իրենց առաջնորդին, ժողովրդավարություն գոյություն չունի, մեկ առաջնորդը կառավարում է 40 տարի։
բ) ողջ գազային պաշարները գտնվում են արաբական երկրներում, սակայն մենք տեսնում ենք, որ աշխարհի աճող տնտեսությունների թվում անգամ արաբական մեկ երկիր գոյություն չունի։
գ) Արաբական երկրներն Իսրայելին դեմ են, սակայն նրանք չունեն արդյունավետ հակաիսրայելական քաղաքականություն։
Դավութօղլուն հավելել է, որ ա) Թուրքիան հունիսի 12-ի խորհրդարանական ընտրությունների անցկացմամբ բոլորին և մասնավորապես արաբական երկրներին ի ցույց է դրել իր ժողովրդավարության մակարդակը, բ) Թուրքիան գլոբալ տնտեսական ճգնաժամից ամենաարագը դուրս եկած երկրների թվում է, գ) Թուրքիան միջազգային արենայում Իսրայելի դեմ շատ ավելի արդյունավետ է գործում, ինչը 40 տարվա ընթացքում չեն կարողացել անել արաբական երկրները։
