Ադրբեջանական 1news.az-ին տված հարցազրույցի ժամանակ Հետխորհրդային տիրույթի ուսումնասիրման գծով տեղեկատվական-վերլուծական կենտրոնի գլխավոր տնօրեն, Մոսկվայի պետական համալսարանի պատմական ֆակուլտետի դեկան Ալեքսեյ Վլասովն անդրադարձել է Ղարաբաղյան հակամարտության կարգավորմանը.
«Հայաստանն ու Ադրբեջանը գտնվում են տեղեկատվական պատերազմի մեջ։ Գոյություն ունի վտանգ, որ այդ տեղեկատվական դիմակայությունը կարող է վերածվել իրական պատերազմի։ Ներկայումս տպավորություն կա, որ բանակցային գործընթացը մոտ ժամանակներս եռակողմ ձևաչափով չի շարունակվելու։ Կազանյան հանդիպումից հետո Մոսկվայի, Երևանի ու Բաքվի մոտ կուտակվել են բավականաչափ մեղադրանքներ միմյանց հանդեպ։
Դեռևս պահպանվում է այդ հոգեբանական անբավարարվածությունը, և իմաստ չունի խորացնել այդ իրավիճակը։ Այլ հարց է, թե արդյոք հնարավո՞ր է Ղարաբաղյան հակամարտության կարգավորման վերաբեռնումը։ Կարծում եմ, որ այդպիսի հնարավորություն գոյություն ունի, սակայն այն բավական փոքր է, եթե վերցնենք կարճաժամկետ հեռանկարը։
Այս դադարը կարող է ձգձգվել մինչև հաջորդ տարվա սկիզբ։ ԵՄ-ն ու Վաշինգտոնը որոշակի քայլեր կձեռնարկեն աշնանն ու ձմռանը, սակայն ես վստահ չեմ, որ նրանց մոդելներն առավել հաջողակ կլինեն, քան Մոսկվայի առաջարկած տարբերակները։ Բաքուն պնդում է նույն բանի շուրջ, իսկ Երևանն առաջ է քաշում Լեռնային Ղարաբաղի կարգավիճակի հարցը, միջնորդներն էլ ոչինչ չեն կարողանում անել։
Ինչ վերաբերում է Մեդվեդև-Պուտին փոխատեղմանը, ապա Ղարաբաղյան հակամարտության կարգավորման գործընթացում չպետք է ակնկալել հատուկ փոփոխություններ։ Ես վստահ չեմ, որ Պուտինը նախկինի նման կստանձնի Երևանի ու Բաքվի միջև գլխավոր միջնորդի դերը։ Հակամարտող կողմերին միմյանցից բաժանում են բավական խոր տարաձայնություններ։
Դրա համար էլ հարց է առաջանում, թե արդյոք Ռուսաստանի նոր նախագահին անհրաժե՞շտ է վտանգել իր հեղինակությունը։ Հավանաբար, տվյալ փուլում Ռուսաստանի համար ելքը «Ոչ խաղաղություն, ոչ պատերազմ» բանաձևի պահպանումն է»։