Թուրքական Dünya Bülteni կայքի փոխանցմամբ՝ Թուրքիայում ահաբեկչական հռչակված ու արգելված «Քրդստանի աշխատավորական» կուսակցությունը (PKK) Եվրոպայից դրամական միջոցները դեպի Հյուսիսային Իրաք է ուղղում Թուրքիայի հարավ-արևելյան հատվածում ընկած Վանի, Հաքքարիի և Շըրնաքի նահանգների միջոցով։
Նշվում է, որ եվրոպական 14 երկրներից բանկերի միջոցով գումարներ են փոխանցվում PKK-ի հաշվին։ Վերջին 1 տարվա ընթացքում PKK-ն ստացել է 200 միլիոն եվրո։ Այդ նպատակով հիմնականում գործածվում է «Եվրոպա-Հաքքարի-Շըրնաք-Վան-Իրաք-Իրան» գիծը։
PKK-ի հիմնական դրամական մատակարարներն են Գերմանիան, Հոլանդիան, Դանիան և Ֆրանսիան։ Գումարներ են ստացվում նաև մեծ Բրիտանիայից, Իռլանդիայից, Իսպանիայից, Իտալիայից, Շվեյցարիայից, Ավստրիայից, Նորվեգիայից, Ֆինլանդիայից, Շվեդիայից, Ռումինիայից։
Այս երկրներում գործում են մոտ 200 միություններ ու հիմնադրամներ, որոնք աջակցում են PKK-ին։
Հիշեցնենք, որ օրեր առաջ Թուրքիայի վարչապետ Էրդողանը հայտարարել էր, որ գերմանական հիմնադրամները թուրքական ու քրդական ընդդիմադիր կուսակցությունների միջոցով ֆինանսական աջակցություն է ցուցաբերում PKK-ին։
