Թուրքիայի խորհրդարանում ունեցած ելույթում Թուրքիայի արտգործնախարար Հաքան Ֆիդանն անդրադարձել է Հայաստան-Ադրբեջան և Հայաստան-Թուրքիայի հարաբերությունների կարգավորմանը։
«Օգոստոսի 8-ին Վաշինգտոնում Ադրբեջան-Հայաստան խաղաղության գործընթացի ընթացքում ցուցաբերված կամքը և Հայաստանի հետ հարաբերությունների կարգավորման գործընթացում մեր արձանագրած առաջընթացն ամրապնդել են տարածաշրջանում երկար սպասված, երկարատև խաղաղության հույսերը»,- ասել է նա։
Ֆիդանն ընդգծել է, որ Ադրբեջանի հետ բացառիկ հարաբերությունները պահպանվում են երկկողմ և բազմակողմ հարթակներում։ «Մենք շարունակում ենք գործել մեր դաշնակից Ադրբեջանի հետ համադրությամբ և համերաշխությամբ՝ Հարավային Կովկասում խաղաղություն և կայունություն հաստատելու ջանքերում»,- ասել է նա։
Հայաստանի կողմից Թուրքիայի և Ադրբեջանի հետ դրսևորված խաղաղ ու կառուցողական մոտեցումը դրական գնահատելով՝ Ֆիդանը նշել է. «Մենք շարունակում ենք երկխոսությունը Հայաստանի հետ տարբեր մակարդակներում, որը ցույց է տվել մեր երկրի հետ հարաբերությունների կարգավորման վերաբերյալ հստակ և նպատակասլաց դիրքորոշում, և մենք անկեղծորեն առաջ ենք մղում մեր համատեղ աշխատանքը՝ ձեռնարկվող կոնկրետ քայլերի ուղղությամբ: Թուրքիան սկզբից ի վեր հանձնառու է եղել Հարավային Կովկասում խաղաղություն հաստատելուն և տարածաշրջանում համատեղ բարգավաճման գոտի ստեղծելուն»,- ասել է նա։
Ընդգծելով, որ Ադրբեջանն ու Հայաստանը կոչ են անում ճիշտ օգտագործել այս պատմական հնարավորությունը և որքան հնարավոր է շուտ կնքել խաղաղության համաձայնագիր՝ Ֆիդանը նշել է, որ Վրաստանի հետ երկկողմ հարաբերությունները, որոնք հասել են ռազմավարական գործընկերության մակարդակի, շարունակում են ամրապնդվել փոխադարձ շահի հիման վրա։
