Թբիլիսիում անվտանգության հատուկ նշանակության ջոկատը Չինաստանի երեք քաղաքացու է ձերբակալել ապօրինի կերպով երկու կիլոգրամ միջուկային նյութ՝ ուրան ձեռք բերելու փորձի ժամանակ։
Ինչպես հայտնում է Վրաստանի հանրային հեռուստատեսությունը, այս մասին մամուլի ասուլիսում հայտարարել է Վրաստանի Պետական անվտանգության ծառայության ղեկավարի առաջին տեղակալ Լաշա Մաղրաձեն։
Նշվում է, որ պետական անվտանգության ծառայության հակահետախուզության և հատուկ գործողությունների վարչությունների աշխատակիցների կողմից համատեղ իրականացված միջոցառման արդյունքում ձերբակալված հանցավոր խումբը ծրագրում էր Թբիլիսիում ռադիոակտիվ նյութի ապօրինի ձեռքբերումը 400 հազար ամերիկյան դոլարով, ապա դրա տեղափոխումը Չինաստան՝ Ռուսաստանի Դաշնության տարածքով։
Հանցավոր պլանի իրականացման նպատակով Չինաստանի մի քաղաքացի, որը գտնվել է Վրաստանի տարածքում՝ մուտքի ռեժիմը խախտելով, ներգրավել է ուրանով հետաքրքրվող փորձագետների և երկրի մասշտաբով սկսել է միջուկային նյութի ակտիվ որոնում։ Նշված գործունեությունն արտերկրից համակարգել են հանցավոր խմբի այլ անդամները։ Ապօրինի գործարքի մանրամասների շուրջ բանակցությունների գործընթացում ստացված օպերատիվ տեղեկատվության իրացման արդյունքում հնարավոր է դարձել պարզել մեղավոր անձանց ինքնությունը և նրանց ձերբակալել։
Վրաստանի Քրեական օրենսգրքի 230-րդ հոդվածի առաջին մասով հարուցված քրեական գործի համաձայն՝ ձերբակալվածներին սպառնում է մինչև 10 տարի ազատազրկում։
