Պակիստանի և Աֆղանստանի պատվիրակությունները հաջորդ շաբաթվա վերջին կշարունակեն բանակցությունները Թուրքիայում, հայտարարել է Պակիստանի պաշտպանության նախարար Խավաջա Ասիֆը։
«Պատվիրակությունները կրկին կհանդիպեն Ստամբուլում հոկտեմբերի 25-ին, և մենք կքննարկենք բոլոր մանրամասները»,- գրել է նա X սոցիալական ցանցում՝ հաստատելով երկու երկրների միջև հրադադարը։
Ավելի վաղ Կատարի արտաքին գործերի նախարարությունը հայտնել էր, որ Պակիստանը և Աֆղանստանը Դոհայում կայացած բանակցությունների ժամանակ համաձայնության են եկել անհապաղ հրադադարի շուրջ:
Երկրները նաև համաձայնել են ստեղծել մեխանիզմներ երկու երկրների միջև կայուն խաղաղությունը ամրապնդելու համար: Հրադադարի կայունությունն ապահովելու և դրա կիրառումը ստուգելու համար որոշվել է առաջիկա օրերին լրացուցիչ հանդիպումներ անցկացնել:
Պակիստանի և Աֆղանստանի միջև իրավիճակը սրվել էր հոկտեմբերի 9-ի ուշ երեկոյան՝ Քաբուլի շրջաններից մեկի վրա Պակիստանի օդային հարվածներից հետո, որոնց հետևանքով սպանվել էին Պակիստանի թալիբների երեք առաջնորդներ, և Աֆղանստանի Պակտիկա նահանգի շուկայի վրա՝ ոչնչացնելով բազմաթիվ առևտրային շենքեր: Աֆղանստանի պաշտպանության նախարարությունն զգուշացրել էր, որ այդ հարվածների հետևանքները կկրեն Պակիստանի ուժերը։
Հոկտեմբերի 11-ից ի վեր Պակիստանը և Աֆղանստանը հայտնել էին բախումների մասին Դուրանդ գծի երկայնքով՝ երկու երկրների միջև սահմանին, որը Քաբուլը չի ճանաչում։ Չորեքշաբթի օրը Պակիստանի արտաքին գործերի նախարարությունը հայտարարել էր Աֆղանստանի հետ ժամանակավոր հրադադարի համաձայնագրի մասին՝ հաջորդ 48 ժամվա ընթացքում, որը հետագայում երկարաձգվել էր մինչև Դոհայի բանակցությունների ավարտը։
