Եգիպտոսի զինվորական իշխանությունները չեն պատրաստվում իրենց թեկնածուին առաջադրել 2012թ. նախագահական ընտրություններին: Այս մասին հայտարարել է Եգիպտոսի Բարձրագույն զինվորական խորհրդի ղեկավար մարշալ Հուսեյն Տանտաուին:
«Դրանք բոլորը բամբասանքներ են, և դրանց շուրջ խոսակցությունները ժամանակի անիմաստ վատնում է»,- ասել է Տանտաուին` ելույթ ունենալով Կահիրեի ռազմական բժշկական համալիրի բացման արարողությանը:
Բացի այդ, երկրի ժամանակավոր առաջնորդը կոչ է արել համաքաղաքացիներին ակտիվ մասնակցություն ցուցաբերել առաջիկա ընտրություններին:
Բարձրագույն զինվորական խորհուրդը Եգիպտոսում իշխանության է եկել փետրվարի 11-ին` Հոսնի Մուբարաքի հրաժարականից հետո: Վերջինս ինքն էր հանձնարարել զինվորականներին կառավարել երկիրը` հաշվի առնելով այն հանգամանքը, որ բանակը ավանդաբար մեծ հեղինակություն և վստահություն է վայելում եգիպտական հասարակության մեջ:
Եգիպտոսի խորհրդարանական ընտրությունները նշանակված է նոյեմբերի 28-ին, նախագահական ընտրությունների օրը դեռ նշանակված չէ: Վերլուծաբանները կարծում են, որ դրանք տեղի կունենան ընթացիկ տարվա վերջին կամ հաջորդ տարվա սկզբին:
