Այսօր ԱԺ-ում ՀՀ վարչապետ Տիգրան Սարգսյանը, անդրադառնալով Ռ. Քոչարյանի հնարավոր վերադարձին քաղաքական դաշտ, որը կարող է շաղկապված լինել տնտեսական խնդիրներով, արձագանքեց.
«Ես այդ հարցին սիրով կպատասխանեմ: Նախագահները միշտ էլ քաղաքականության մեջ են: Եվ Լևոն Տեր-Պետրոսյանը, և Ռ. Քոչարյանը յուրաքանչյուրն ընտրում է իր համար քաղաքական դաշտ, օրինակ՝ Տեր-Պետրոսյանը երկար ժամանակ լռում էր: Ինչ վերաբերում է Ռ. Քոչարյանին՝ ես ուզում եմ ասել հետևյալը. երկրում սոցիալ-տնտեսական, քաղաքական պատասխանատվությունը ստանձնել են երեք կոալիցիոն կուսակցություն: Ավելին՝ ՀՀԿ-ն եղել է նաև Քոչարյանի քաղաքական հենարանը: Ես կարծում եմ, որ այն հենարանը, որն ունի Սերժ Սարգսյանը, ունի բավարար քաղաքական ուժ, կամք, հնարավորություն ապահովելու մեր երկրի բնականոն զարգացումը:
Ս. Սարգսյանը և Ռ. Քոչարյանը եղել են, կան և լինելու են ընկերներ, մտերիմ ընկերներ, մարտական ընկերներ, գործընկերներ, մարդիկ, ովքեր անցել են պատերազմի միջով, մարդիկ, ովքեր տեսել են փորձություններ, կիսել են դրանց դառը պտուղները: Մարդիկ, ովքեր տոնել են միասին հաղթանակներ: Եվ ինչպես որ Ս. Սարգսյանն է եղել Ռ. Քոչարյանի համար ամուր թիկունք, այնպես էլ, հավատում եմ, որ Ռ. Քոչարյանն է լինելու Ս. Սարգսյանի համար աջակից և ամուր թիկունք»:
