«Փաստարկ» մամուլի ակումբի այսօրվա հյուրը Արևելագիտության ինստիտուտի տնօրեն Ռուբեն Սաֆրաստյանն էր, ով խոսեց տարածաշրջանային գործընթացներից:
«Տարածաշրջանը գտնվում է փոփոխությունների փուլում` աշխարհաքաղաքական առումով»,- ասաց քաղաքագետը և մատնանշեց դրանցից մի քանիսը:
«Ակնհայտ է դառնում, որ արաբական աշխարհում ըմբոստությունը նպաստեց իսլամիստական ուժերի ակտվությանը: Հաջորդը` Արևմուտքի, մասնավորապես ԱՄՆ-ի` գնալով ուժեղացող ջանքերն են Մերձավոր Արևելքում, և իմ կարծիքով կլինի ԱՄՆ-ի կողմից ավելի խորը ներգրավում: Հաջորդը` Թուրքիայի ակտիվացումն է՝ Մերձավոր Արևելքում, խորը ներգրավումը Սիրիայի ընթացող գործընթացներում: Այս առումով նոր միտում է նկատվում` Թուրքիան, համաձայնելով իր տարածքում տեղադրել հակահրթիռային համակարգը` ԱՄՆ-ի կողմից, քարտ բլանշ է ստանում` Մերձավոր Արևելքում դիրքերն ամրապնդելու ուղղությամբ: Հոկտեմբերի 12-ին Բաքվում կկայանա Թուրքիայի և Ադրբեջանի միջև փաստաթղթերի ընդունում` ծանր զենքի արտադրության, տանկերի, ռազմական ուղղաթիռների համատեղ արտադրության առնչությամբ»,- նշեց Սաֆրաստյանը:
Թուրքիան վերջին շրջանում ցույց է տալիս իր ռազմական կարողությունները, իսկ սա նոր երևույթ է, և ըստ քաղաքագետի՝ տարածաշրջանում նոր տեղաշարժեր են տեղի ունենում:
«Ստեղծված իրավիճակում Թուրքիայի գործող վարչակարգի համար հայ-թուրքական հարաբերությունների կարգավորման հարցը օրակարգային հարց է, և այն կմնա սառեցված»,- նշեց փորձագետը:
Անդրադառնալով ԼՂ կարգավորման գործընթացում «թայմ-աութի» երկարաձգմանը՝ քաղաքագետը նշեց, որ դա պայմանավորված կլինի ընտրական պրոցեսներով, և եթե վերջին շրջանում ՌԴ-ն էր ակտիվացում մտցրել գործընթացում, ապա քանի որ այնտեղ էլ ընտրական պրոցեսներ են սպասվում, հետևաբար մինչև 2012 թվականի կեսերը կարգավորման գործընթացը կմնա նույն իրավիճակում:
Պատասխանելով լրագրողների հարցին, թե մինչև 2012-ը Ադրբեջանը կարո՞ղ է դիմել ռազմական ուժի, Սաֆրաստյանն ասաց, որ նման մտավախություններ կան, և ինքը պատահական չի համարում ՌԴ ԱԳ նախարար Ս. Լավրովի ասածը, որն, ըստ էության, նշանակում է պաշտոնական հայտարարություն այն մասին, որ ՌԴ-ն ռազմական ուժի կիրառում թույլ չի տա: Հայաստանը պետք է դիվանագիտորեն ցույց տա, որ Ադրբեջանը իսկապես պատրաստ է պատերազմի: Քաղաքագետը չբացառեց, որ Ադրբեջանը մոտ ապագայում դիմի ռազմական ուժի կիրառման:
