Հայաստանը և Քուվեյթը կկապվեն ուղիղ ավիափոխադրումներով, երկու երկրներում փոխադարձ կբացվեն դեսպանություններ, Քուվեյթը կաջակցի նաև Հայաստան-Իրան երկաթգծի կառուցմանը: Այս մասին այսօր Երևանում կայացած հայ-քուվեյթական միջկառավարական հանձնաժողովի անդրանիկ նիստից հետո լրագրողներին հայտնեցին հանձնաժողովի համանախագահներ՝ ՀՀ փոխվարչապետ Արմեն Գևորգյանը և Քուվեյթի Պետության ֆինանսների նախարար Մուստաֆա Ջասեմ ալ-Շամալին:
Նիստի ժամանակ ստորագրվեց երկու երկրների միջև օդային հաղորդակցության մասին համաձայնագիր:
«Ենթակառուցվածքների զարգացման գործում մեծ հնարավորութուն է ստեղծվում կարգավորելու ապրանքաշրջանառությունը Ծոցի և Սևծովյան երկրների հետ»,- ասաց Ա.Գևորգյանը` հույս հայտնելով, որ մինչև տարեվերջ նորանշանակ դեսպանը իր պաշտոնը կզբաղեցնի ՀՀ-ում, և Քուվեյթը կլինի Ծոցի առաջին երկրներից, որ դեսպանություն կունենա ՀՀ-ում:
Մ. Ջասեմ ալ-Շամալին նշեց, որ Հայաստանում գտնվելու երկու օրվա ընթացքում կայացած հանդիպումներում անդրադարձ է եղել շատ հարցերի, որ կարելի է իրականացնել միասին. «Մենք ուզում ենք, որ Քուվեյթը նույնպես մասնակցի այս ծրագրերին և աջակցի երկաթգծի կառուցմանը, որը կծառայի ՀՀ տնտեսությանը և Քուվեյթի տնտեսությանը»:
Կողմերի միջև պայմանավորվածություն է ձեռք բերվել գործարարների փոխայցելությունների, համատեղ գործարար համաժողովների, ցուցահանդեսների ներդրումային ոլորտում համագործակցության, Հայաստանից Քուվեյթ գյուղատնտեսական ապրանքների արտահանման, մրցակցության հնարավորությունները գնահատելու մասին:
