ԱՄՆ նախագահ Բարաք Օբաման առաջին անգամ խոստովանել է, որ կարող է պարտվել 2012 թ. նախագահական ընտրություններում: Սպիտակ տան ղեկավարի կարծիքով՝ գլխավոր պատճառն այն է, որ իր թիմին չի հաջողվել հաղթահարել տնտեսական խնդիրները և իրականացնել խոստացված բարեփոխումները:
«Ես չեմ կարծում, որ վերջին տարիներին ամերիկացիներն սկսել են ավելի լավ ապրել: Մեզ հաջողվել է հասնել տնտեսական կայունության, սակայն գործազրկության մակարդակը նախկինի պես շատ բարձր է»,- խոստովանել է Օբաման: Օգոստոս ամսվա տվյալներով` աշխատունակ ամերիկացիների 9.1 %-ը գործազուրկ է, ինչը վերջին տարիների ամենացածր ցուցանիշն է:
ABC դաշնային հեռուստաալիքին և Yahoo! պորտալին տված հարցազրույցում պատասխանելով այն հարցին, թե արդյոք ինքը պատրա՞ստ է դառնալ «մեկ ժամկետով նախագահ», Օբաման ասել է. «Այսպիսի տնտեսական իրավիճակում դժվար է ակնկալել ավելին: Ինձ չի անհանգստացնում, որ մարդիկ ինձ անհաջողակ կհամարեն»:
Նախագահի կարծիքին են սոցիոլոգները: Չնայած ԱՄՆ ներկա վարչակազմի ձեռք բերած որոշակի նվաճումներին, հատկապես արտաքին քաղաքականության բնագավառում, Օբամայի հաղթանակին հավատում է ամերիկացիների միայն 37%-ը, իսկ 55%-ը կարծում է, որ ԱՄՆ հաջորդ նախագահը պետք է լինի հանրապետական:
Օբամայի գլխավոր ձախողումներից մեկը եղել են նրա նախաձեռնած բարեփոխումները առողջապահության ոլորտում: Այժմ դրա օրինականությունը վիճարկվում է Գերագույն դատարանում: Ամերիկացիների դժգոհությունն արտահայտվում է «Գրավեք Ուոլ-Սթրիթը» շարժմամբ, որն աստիճանաբար ներգրավում է ԱՄՆ նոր քաղաքներ: