Ռուսական Regnum լրատվական գործակալության փոխանցմամբ՝ SOCIUM սոցիոլոգիական և մարկետինգային հետազոտությունների կենտրոնը (Մոսկվա) այս տարվա սեպտեմբերի 29-ից հոկտեմբերի 2-ն ընկած ժամանակահատվածում մի շարք հասարակական-քաղաքական այժմեական խնդիրների շուրջ հարցախույզ է անցկացրել Հարավային Օսիայում։
Հարցախույզին մասնակցել է 700 մարդ։ Ի պատասխան «Արդյոք դուք տեղյա՞կ եք, որ 2011 թվականի նոյեմբերի 13-ին Հարավային Օսիայում պետք է ռուսերեն լեզվի կարգավիճակի որոշման վերաբերյալ հանրաքվե անցկացվի» հարցին՝ հարցախույզի մասնակիցների 81.2 տոկոսը դրական պատասխան է տվել, իսկ 18.5 տոկոսը՝ բացասական։ 0.3 տոկոսը դժվարացել է պատասխանել։
Հանրաքվեին մասնակցելու վերաբերյալ հարցին դրական պատասխան է տվել 83 տոկոսը, բացասական՝ 10.2 տոկոսը, մնացած 6.8 տոկոսն էլ դժվարացել է պատասխանել։
«Համաձա՞յն եք, որ Հարավային Օսիայի պետական լեզուներ հանդիսանան օսերենն ու ռուսերենը» հարցին դրական պատասխան է տվել մասնակիցների 86.1 տոկոսը, բացասական՝ 2.5 տոկոսը, իսկ 11.4 տոկոսն էլ դժվարացել է պատասխանել։
«Ինչպե՞ս եք վերաբերվում նրան, որ Հարավային Օսիան միավորվի Հյուսիսային Օսիայի հետ և հետագայում մտնի Ռուսաստանի կազմի մեջ» հարցին դրականորեն է պատասխանել 87.9 տոկոսը։