«Հազարամյակի մարտահրավեր-Հայաստան» ծրագրի հաջող ավարտի կապակցությամբ վարչապետ Տիգրան Սարգսյանն այսօր հրավիրել է ընդունելություն:
Ողջունելով ներկաներին՝ վարչապետը նշել է, որ կառավարության համար չափազանց կարևոր էր 2011թ. մայիսին Հայաստան այցելած «Հազարամյակի մարտահրավեր» հիմնադրամի գործադիր տնօրեն Դենիել Յոհաննեսի այն գնահատականը, ըստ որի՝ երկուստեք առկա է վճռականություն՝ խորացնելու երկկողմ հարաբերությունները: Կառավարության ղեկավարի խոսքով՝ Հայաստանում գտնվող «Հազարամյակի մարտահրավեր հիմնադրամ» ծրագրի փոխնախագահ Փաթրիք Ֆայնի հետ հանդիպմանն այսօր ամփոփվել են ծրագրի արդյունքները.
«Հազարամյակի մարտահրավեր» ծրագրի շրջանակում մշակվել են նոր չափանիշներ, մեթոդաբանություն, որը դառնալու է մեր կառավարության ուսումնասիրության առարկան և մենք ձգտելու ենք համապատասխանել այդ չափանիշներին: Հայաստանի կառավարության անունից շնորհակալություն եմ հայտնում ԱՄՆ կառավարությանը՝ տրամադրված օժանդակության համար: Ուրախ եմ և հպարտ այն հանգամանքով, որ «Հազարամյակի մարտրահրավերներ» կորպորացիայի կողմից Հայաստանում իրականացված ծրագիրը լավագույնն է գնահատվել: Դա մեզ հույս է ներշնչում, որ մենք ի վիճակի ենք գալ համաձայնության հիմնադրամի հետ և ապագայում իրականացնել նոր ծրագիր»:
Նշելով, որ ծրագրի կարևորագույն չափանիշները վերաբերում էին ոչ միայն ծրագրով սահմանված թիրախներին, այլև Հայաստանում ժողովրդավարության ամրապնդմանը և տնտեսական հիմքերի ստեղծմանը՝ գործադիրի ղեկավարն ընդգծել է, որ Հայաստանի կառավարությունը լի է վճռականությամբ՝ ջանքեր գործադրել, որպեսզի այս ծրագիրը Հայաստանի Հանրապետությունում ունենա շարունակական բնույթ:
Վարչապետը նշել է, որ «ՀՄՀ-Հայաստան» ծրագիրը հայ-ամերիկյան համագործակցության հաջողված կարևորագույն դրսևորումներից մեկն է: «ՀՄՀ-Հայաստան ծրագրի թիրախն այնպիսի ճյուղերն էին, ինչպիսին են՝ ոռոգման ենթակառուցվածքների արդիականացումը և գյուղացուն նոր գիտելիքների, նոր ու առաջադեմ տեխնոլոգիաների փոխանցումը: Ծրագրի շրջանակում ԱՄՆ կառավարության կողմից տրամադրվել է 177 միլիոն դոլար, որի շրջանակում վերականգնվել են ջրանցքներ, ջրագծեր, դրենաժներ, արդիականացվել են պոմպակայաններ, հուսալի ոռոգման ջուրը հասանելի է դարձել մոտ 70.000 հեկտար հողատարածքների համար, իսկ նրանից օգտվողների քանակը կազմում է 427.000 գյուղաբնակներ: Ընդ որում՝ ծրագրի դրական ազդեցությունն իր ողջ ուժով մենք կզգանք մոտակա 2 տարիների ընթացքում, քանի որ ենթադրվում է, որ մշակվող հողատարածքների ծավալը այդ ընթացքում այս ծրագրի շնորհիվ շարունակելու է ընդլայնվել»:
«Հազարամյակի մարտահրավերներ» կորպորացիայի (ՀՄԿ) ՀՄՀ ծրագրերի իրականացման հարցերով փոխնախագահ Փաթրիք Ֆայնն իր հերթին նշել է, որ զգալի ներդրումներ կատարելով մեր երկրի ոռոգման ենթակառուցվածքներում և ագրոբիզնեսի ոլորտում՝ իրենք քայլ են կատարել աղքատության նվազեցման ուղղությամբ: «Ծրագրի ընթացքում ունեցել ենք մեծ ձեռքբերումներ, և դա մեզ համար շատ ուրախալի է: Այս օրինակը ցույց է տալիս, որ Հայաստանը նախաձեռնում է աշխատանքներ՝ իր քաղաքացիների համար բարեկեցություն ապահովելու համար»:
Ընդունելությանը ներկայացվել է նաև «ՀՄՀ-Հայաստան» ծրագրի կողմից իրականացված աշխատանքների մասին պատմող տեսաֆիլմ:
