Ռուսական Regnum լրատվական գործակալությունը, վկայակոչելով թուրքական լրատվամիջոցները, հայտնում է, որ Թուրքիան Սիրիայի նախագահ Բաշար Ալ-Ասադին ճնշելու համար կազմել է 4 կետից բաղկացած պլան:
Խոսքը Սիրիայի դեմ կիրառվելիք քաղաքական, տնտեսական, ռազմական ու հոգեբանական պատժամիջոցների մասին է: Ըստ այդ պլանի` Թուրքիան բոլոր միջազգային ֆորումներում ու հանդիպումներում շարունակելու է քննադատել Ասադի կառավարությանը, ուժեղացնելու է իր շփումները սիրիական ընդդիմության հետ և աջակցելու է Ստամբուլում Սիրիայի Ազգային անցումային խորհրդի ձևավորմանը:
Սակայն այդ ամենի հետ մեկտեղ, Թուրքիան մտադիր չէ Դամասկոսից հետ կանչել իր դեսպանին: Տնտեսական ոլորտում խոսքը գնում է Սիրիայի հետ բոլոր ներդրումային նախագծերը կասեցնելու մասին: Սակայն Անկարան ամբողջովին չի խզելու Սիրիայի հետ իր տնտեսական կապերը, իսկ սիրիացի քաղաքացիների համար կշարունակի պահպանել առանց անցագրի ռեժիմը:
Չեղյալ են հայտարարվելու ռազմական ոլորտի հետ կապված բոլոր համատեղ ռազմական ու սահմանամերձ զորավարժությունները, ինչպես նաև նախկին ռազմական համաձայնագրերը:
Այս ամենից բացի, Անկարան Դամասկոսի վրա հոգեբանական ճնշում է գործադրելու և շարունակելու է օգնել սիրիացի փախստականներին:
Հիշեցնենք, որ ավելի վաղ թուրքական կողմը տարբեր մակարդակներով քանիցս հայտարարել է, որ Ասադը հիասթափեցրել ու դավաճանել է իրեն` լցնելով իր համբերության բաժակը:
