Սույն թվականի հոկտեմբերի 6-ին ժամը 9:00-ին Անի Պլազա հյուրանոցում կմեկնարկի «Ի՞նչ ապագա ունի ժողովրդավարությունը և քաղաքացիական հասարակությունը» եռօրյա միջազգային համաժողովը, որին կմասնակցեն մարդու իրավունքների, ժողովրդավարության, թափանցիկ և հաշվետու գործելաոճի և արդյունավետ կառավարման խնդիրներով մտահոգ տեղական և արտասահմանյան բարձրակարգ մասնագետներ: Ավելի քան 30 երկրից մոտ հարյուր փորձագետ, ներառյալ Միացյալ Թագավորություն, Միացյալ Նահանգներ, Կենտրոնական և Արևելյան Եվրոպայի, ինչպես նաև ԱՊՀ երկրներից մասնակցելու են համաժողովին:
Ծավալվելու է քննարկում, սրընթաց փոփոխվող միջազգային քաղաքական մթնոլորտում, ժողովրդավարության և մարդու իրավունքների մարտահրավերների շուրջ:
Համաժողովը կազմակերպվում է Բաց հասարակության հիմնադրամներ – Հայաստանի (ԲՀՀ) կողմից` ԲՀՀ Արևելք-արևելք. գործընկերություն սահմաններից այն կողմ, ԲՀՀ մարդու իրավունքների և կառավարման գրանտային ծրագրի, ինչպես նաև Քաունթերփարթ Ինթերնեշնլ – Հայաստան կազմակերպության ԱՄՆ ՄԶԾ կողմից ֆինանսավորվող Քաղաքացիական հասարակության և տեղական ինքնակառավարման մարմինների օժանդակության ծրագրի ֆինանսական աջակցությամբ:
«Այս համաժողովը հատկապես կարևոր է հետխորհրդային հանրապետություններում ժողովրդավարության հետընթացի, ինչպես նաև այն համատեքստում, որ 2010թ. ազատությունը գլոբալ տեսակետից ևս հետընթաց է արձանագրել (ըստ Freedom House-ի ուսումնասիրության), միաժամանակ, ֆինանսական ճգնաժամը վնասել է ոչ միայն արևմուտքի հարստությանը, այլ նաև, որ ավելի կարևոր է, ազդել է ազատ մտքի վրա», ասաց ԲՀՀ Հայաստանի գործադիր տնօրեն Լարիսա Մինասյանը: «Միևնույն ժամանակ, Մերձավոր արևելքում ժողովրդավարությանն անցնելու փորձերը հերքում են այն գաղափարը, որ ժողովրդավարությունը հեռու է ոչ-արևմտյան հասարակություններից` վերահաստատելով վստահությունը ժողովրդավարության հանդեպ և լիցք հաղորդելով ժողովրդավարությանն ուղղված միջազգային աջակցությանը:
Համաժողովի նպատակն է հանդիսանալ հարթակ նոր գաղափարների և առաջադեմ մտածելակերպի համար և ծավալել հասարակական բաց բանավեճ, որը լույս կսփռի ժողովրդավարական կառավարման ապագայի բավականին խառն ու անորոշ պատկերի վրա, ինչպես նաև քաղաքացիական հասարակությանն ու հանրային քաղաքականություն մշակողներին կառաջարկի հնարավոր լուծումներ` արդյունավետ ժողովրդավարական փոփոխությունների համար»:
Համաժողովի առաջին օրը պլենար նիստերի բանախոսները կքննարկեն արևմուտքի կողմից ժողովրդավարության աջակցության սահմանափակումների խնդիրները և կառավարման բնույթը նորահայտ կիսա-ժողովրդավարական երկրներում, քաղաքացիական հասարակության դերը ժողովրդավարության առաջխաղացման համընդհանուր գործում և այն մարտահրավերները, որոնց Եվրոպական Միությունը բախվում է ավտորիտար ռեժիմ ունեցող երկրներում` քաղաքական և տնտեսական փոփոխությունների փորձ իրականացնելիս:
Համաժողովի երկրորդ օրը, մարդու իրավունքներին, հաշվետվողականությանը և թափանցիկությանը, ինչպես նաև ժողովրդավարական հաստատություններին և արդյունավետ կառավարման կառույցներին նվիրված նիստերի բանախոսները, իրենց տեսակետը կկիսեն այն գլոբալ քայլերի շուրջ, որոնք ուղղված են տեղում առաջ մղելու և երաշխավորելու մարդու իրավունքները: Նրանք նաև կանդրադառնան այդ քայլերի արդյունավետությանն ու այն միջոցներին, որոնք միտված են առավել կայունությանը և ժողովրդավարեցմանը:
Անդրադարձ կկատարվի նաև այն իրական մարտահրավերներին, որոնց քաղաքացիական հասարակությունը բախվում է, երբ բարձրաձայնում է խնդիրներ, որոնք առնչվում են կառավարության թափանցիկությանը և հաշվետվողականությանը, լրատվամիջոցների, դատարանների, ընտրությունների հանդեպ հասարակության վստահության թուլացմանը, ինչպես նաև հասարակության ու կառավարության միջև աճող բևեռացմանը:
«Ժողովրդավարական զարգացումը հենց այսպիսին է՝ աճ, հետընթաց, քաղված դասեր, բարելավումներ, ինչպես նաև ինքնաքննադատության կարողություն», ասել է Ալեքս Սարդարը` Քաունեթերփարթ ինթերնեշնլ – Հայաստանի տնօրենը: «Սա հիշելով հույս ունենք, որ շահագրգիռ անձանց համախմբելով ընդհանուր քննարկումների շուրջ, կկարողանանք կատարել հաջորդ քայլն այս գործընթացում: Սա կարևոր հնարավորություն է պետության, քաղաքացիական հասարակության, մասնավոր հատվածի, միջազգային և տեղական դերակատարների համար` լրացնելու միմյանց առաջարկներն ու քննադատությունները», հավելեց նա:
Զեկուցողները կամփոփեն յուրաքանչյուր նիստի քննարկումները հոկտեմբերի 8-ին` համաժողովի վերջին օրը: Համաժողովի ֆորմատը հնարավորություն կընձեռի նիստերի բոլոր մասնակիցներին տեսակետներ փոխանակել, բանավիճել և պատասխանել հարցերի:
ՀՀ կառավարության, Հայաստանում գործող միջազգային կազմակերպությունների, դիվանագիտական կորպուսի և լրատվամիջոցների ներկայացուցիչները հրավիրված են մասնակցելու Համաժողովին:
